Kabineti i sigurisë i Izraelit ka miratuar një plan të lig që Izraeli të pushtojë Rripin e Gazës dhe ta kontrollojë atë nga ushtria izraelite për një periudhë të pacaktuar kohore, thanë burime qeveritare të hënën.
Kryeministri izraelit ka publikuar një videomesazh të ri në hebraisht në X, ku trajton një plan të miratuar nga qeveria për të zgjeruar ofensivën në Gaza.
Sipas fragmenteve të përkthyera të raportuara nga Reuters, Netanyahu tha se popullsia palestineze e Gazës “do të zhvendoset, për mbrojtjen e tyre”. Tetëmbëdhjetë muaj sulmesh izraelite kanë vrarë më shumë se 52,000 njerëz, përfshirë mijëra fëmijë, dhe kanë plagosur gati 120,000 të tjerë.
Netanyahu tha gjithashtu se ushtarët izraelitë nuk do të hyjnë në Gaza, nuk do të nisin sulme dhe më pas nuk do të tërhiqen. “Qëllimi është i kundërt me këtë,” tha ai.
Mediat izraelite raportuan sot se kabineti izraelit mbrëmë miratoi një plan për të ofruar ndihmë për njerëzit në Gazën e shkatërruar nga lufta përmes ndërmjetësve privatë, bazuar në dorëzimin e pakove të ndihmës tek individët.
Gazeta Times of Israel citoi zyrtarë të kenë thënë se plani i miratuar e pengon ushtrinë izraelite të shpërndajë pako ndihme për individët në Gaza, ndërkohë që ofron një shtresë të jashtme sigurie për kompanitë private dhe organizatat ndërkombëtare që shpërndajnë pako ndihme.
Plani i ri, i cili nuk ka një datë zyrtare zbatimi, u miratua nga të gjithë anëtarët e kabinetit përveç ministrit të Sigurisë Kombëtare, Itamar Ben-Gvir.
Washington Post raporton gjithashtu se plani do të përfshijë ndërmjetësues amerikanë dhe duhet të zbatohet para fundit të muajit, ndoshta pas vizitës së Presidentit Donald Trump në rajon në mesin e majit.
Megjithatë, plani izraelit është refuzuar nga Kombet e Bashkuara (OKB) dhe dhjetëra grupe ndërkombëtare humanitare, duke thënë se është në kundërshtim me parimet humanitare, logjistikisht i parealizueshëm dhe mund të rrezikojë civilët dhe personelin palestinez.
Ekipi humanitar i OKB-së për Gazën tha mbrëmë se mund të mbështesë vetëm plane që respektojnë parimet humanitare të humanitetit, neutralitetit, pavarësisë dhe paanshmërisë. /tesheshi.com/
