Karaçeva e Kamenicës, fshati që javë më parë u bë lajm kryesor në Kosovë, pasi aty u panë patrulla të xhandarmërisë serbe, është bërë sërish lajm pas një aksioni policor, i cili ka patur në shënjestër një aferë lojrash fati. Për këtë arsye, 10 efektivë policorë kanë rënë në pranga, mes gjithsej 33 të arrestuarve.
“Operacioni ka filluar si rezultat i një hetimi gati njëvjeçar të udhëhequr nga Prokuroria Themelore në Gjilan, lidhur me pretendimet për veprimtari të paligjshme, përfshirë bixhozin e paligjshëm, trafikimin me njerëz, trafikimin me armë, trafikimin me narkotikë, kontrabandimin e mallrave dhe aktivitete tjera kriminale”, thuhet në komunikatë.
“Kthim të normalitetit në çdo fushë” e ka quajtur kryeministri Hoti aksionin e Policisë së Kosovës në Karaçevë.
“Operacioni i policisë në Karaçevë, i mbështetur edhe nga mekanizmat tjerë, është dëshmi se institucionet tona të sigurisë janë plotësisht të afta për të garantuar rend dhe ligj për qytetarët e Republikës së Kosovës. U jam mirënjohës të gjithë atyre që me përkushtim e profesionalizëm planifikuan dhe zbatuan një operacion kompleks e delikat. Ky është vetëm fillimi i kthimit të normalitetit në çdo fushë”, ka shkruar Hoti.
Po ashtu, në këtë aksion, njoftohet se u rrënuan edhe 12 objekte ku zhvillohej veprimtaria e bixhozit dhe lojërave të fatit. /tesheshi.com/
