Operacioni ku u kapën në portin e Durrësit mbi 600 kilogram kokainë ka nisur prej disa muajsh. Ky operacion që u finalizua nga policia shqiptare ka si partner bazë DEA-n amerikane. Kamioni që transportonte bananet nga Kolumbia është ndjekur me GPS që është vendosur në kontenier.
Ky operacion është pjesë e monitorimit që BE nëpër operacionit FRONTEX ka nisur në Durrës.
De jure, kamioni ishte destinacion për një kompani frutash në Maminas. Por de fakto bëhet fjalë për një grup shumë të fuqishëm kriminal që ka financiar blerjen. Plot 613 kg kokaine ishte fshehur në kontenierin e bananeve të ardhur nga Kolumbia. Destinacioni përfundimtar i ngarkesës ishte Italia. Kokaina ishte e paketuar dhe e fshehur në ambientet e brendshme të kamionit. Droga ndodhej në kalatën e gjashtë të portit që prej datës 21 shkurt.
Rezultati pozitiv erdhi pas instalimit të një grupi të madh ekspertësh nga BE në kufirin shqiptar. Bëhet fjalë për një grup të madh të programit FRONTEX të Bashkimit Europian. Pas firmosjes së marrëveshjes mes Xhafajt dhe Avramopulos, BE kontrollon kufirin.
“Thembra e Akilit” në këtë operacion është natyrisht Porti i Durrësit. Ekspertët e FRONTEX nuk do të jenë të përhershëm, por do të vijnë me rotacion në Shqipëri. Shërbimet e SHBA dhe BE kanë hartuar një raport të hollësishëm për Portin e Durrësit. Aty prej 27 vitesh është qendra e kalimit të drogës drejt Italisë, e më pas Europës.
Guardia di Finanza italiane ka dorëzuar muajin e shkuar një raport tepër konfidencial. Raporti është dorëzuar edhe në zyrën e Fatmir Xhafës dhe tek Kryeprokurorja. Ai shpjegonte në mënyrë të detajuar mekanizmin e kalimit të narkotikëve. Në raport flitet edhe për njerëzit që janë marrë me këtë “punë”.
Përveç njerëzve që do të jenë të instaluar në pikat kufitare, FRONTEX ka edhe undercover. Ata kanë rekrutuar bashkëpunëtorë që të arrihet një depërtim sa më i gjerë.
Marrëveshja FRONTEX, është një pakt i cili do të jetë një lloj prove për qeverinë Shqipëtare deri në muajin prill, kohë kur pritet që Komisioni Europian të hartojë raportin për hapjen e negociatave.
Bashkëpunimi i autoriteteve shqiptare me misionin FRONTEX do të jetë një gur prove. Qoftë edhe një lëvizje apo “hile shqiptare” do të shënohet me të kuqe në raportin që do të dërgohet në Bruksel.
Para pak ditësh, Edi Rama vendosi ndryshimin e kreut të Autoritetit Portual të Durrësit. Është larguar Arjan Qirici dhe është vendosur Afrim Bakaj, një kandidat për deputet i PS-së.
Bakaj konsiderohet si një nga njerëzit e rëndësishëm të PS-së për Durrësin. Agjentët e këtij program të BE-së nuk është se vijnë për herë të parë në Shqipëri.
Në vitin e largët 1996 ata u vendosën në Shkodër për të mbikqyrur respektimin e embargos së naftës, të cilën OKB i vendosi Jugosllavisë së Millohseviçit. /tesheshi.com/
