Bosi mafioz Matteo Messina Denaro është arrestuar mëngjesin e sotëm në Itali, raportojnë mediat italiane.
Denaro është në arrati që nga viti 1993 dhe konsiderohet si një nga mafiozët më famëkeq në botë. Operacioni u krye nga Ros dei Carabinieri dhe i koordinuar nga prokurori i Palermos Maurizio de Lucia dhe zëvendësprokurori Paolo Guido.
Denaro u arrestua në klinikën Maddalena në Palermo, një spital për trajtimin e kancerit. Lajmi vjen një ditë pas 30-vjetorit të kapjes së Totò Riina-s. Menjëherë pas arrestimit të këtij të fundit, Messina Denaro, shefi i distriktit Castelvetrano dhe një nga përfaqësuesit më të famshëm të mafies në provincën e Trapanit, u bë një nga bosët më të fuqishëm të të gjithë Cosa Nostra-s.
Messina Denaro ka qenë i arratisur që në verën e vitit 1993, kur në një letër drejtuar të dashurës së tij të atëhershme Angela, pas masakrave mafioze në Romë, Milano dhe Firence, shpalli fillimin e jetës së tij si Scarlet Pimpernel.
“Do të dëgjoni nga unë”, i shkruante ai, duke i lënë të kuptohet se ishte i vetëdijshëm se emri i tij së shpejti do të lidhej me gjakderdhje të rëndë. “Do të më përshkruajnë si djall, por të gjitha janë gënjeshtra”.
Ai u dënua me burgim të përjetshëm për dhjetëra vrasje, për masakrat në 1992 në të cilat u vranë gjyqtarët Falcone dhe Borsellino dhe për sulmet në Milano, Firence dhe Romë në 1993. Forbes e quajti atë një nga 10 kriminelët më të kërkuar në botë. /tesheshi.com/
