Urimit klasik për nisjen e Ramazanit, Myftiu i Kosovës, Naim Tërnava i ka bashkangjitur dhe atë për një fushatë zgjedhore dinjitoze.
Është ky ndër të rrallat raste ku muaji i Ramazanit, ka koinçiduar me dy fushata zgjedhore, në Shqipëri e Kosovë, edhe kjo një koinçidencë më vete.
Por kreun e muslimanëve të Kosovës e lidh dhe diçka e drejtpëdrejtë me politikën: kandidimi i vajzës, Refiçe Tërnava në këto zgjedhje, duke qenë në listën e koalicionit LDK-AKR-Alternativa. “Urojmë dhe shpresojmë që gjatë këtij muaji të rahmetit e mëshirës, spektri ynë politik pjesëmarrës në zgjedhje do të zhvillojë një fushatë dinjitoze, të përgjegjshme, të qytetëruar”, tha kreu i BIK-ut Tërnava, duke i paraprirë këtij urimi me fjalët se “agjërimi e pajis besimtarin me një virtyt të çiltër, me një vetëdije vigjilente dhe të shëndoshë, me durim e zemërgjerësi, me moral e edukatë të fortë.” /tesheshi.com/
