Abeba Aregawi, atletja kampione bote në 1500 metra në salla të mbyllura, është pezulluar nga Federata Suedeze e Atletikës pasi ka rezultuar pozitive në testin e dopingut.
25-vjeçarja me origjinë etiopiane, që garon për Suedinë, ka dështuar në testin e IAAF-së, e rezultuar pozitive për një substancë të ndaluar të paspecifikuar.
Atletja Aregawi ka kërkuar të bëjë testin B, në kërkim të pafajësisë.
“Ne jemi tërësisht kundër të gjitha formave të mashtrimit, dopingut dhe substancave të ndaluara. Ne kemi tolerancë zero, dhe kjo është krejtësisht e papranueshme,” ka deklaruar Stefan Olsson, sekretari i përgjithshëm i federatës suedeze.
Pezullimi i atletes e vë në dyshim pjesëmarrjen e saj për Suedinë në Lojërat Olimpike që do të zhvillohen në gusht të këtij viti.
Komiteti Olimpik i Suedisë ka reaguar menjëherë, duke ia hequr atletes të gjithë mbështetjen financiare.
Aregawi pati përfaqësuar Etiopinë në Lojërat Olimpike të Londrës në vitin 2012, por me marrjen e nënshtetësisë suedeze nisi të garojë për Suedinë. Ajo pati marrë medaljen e artë në botërorin e atletikës në Moskë në 2013-ën, e një vit më pas do të dilte e para në garën e 1500 metrave në botërorin në salla të mbyllura në Sopot të Polonisë. /tesheshi.com/
