Kreu i Kuvendit të Kosovës, Kadri Veseli konsideron se viti 2015 ishte një vit i vështirë, si për funksionarët institucionalë, ashtu edhe për përfaqësuesit e mediave.
“Këtë vit Kosova u ballafaqua me testin e funksionimit si shtet demokratik dhe ligjor. Duhet të jemi realistë, këtë test, ende nuk e kemi kaluar. Kuvendi i Kosovës u ballafaqua me një situatë të paprecedent, jo vetëm për parlamentarizmin tonë, por edhe më gjerë”, theksoi Veseli, në pritjen e organizuar për mediat si dhe për përfaqësuesit e shoqërisë civile me rastin e përmbylljes njëvjeçare të punës së Kuvendit.
Ai shtoi se pengimi i punës së Kuvendit me veprime jo parlamentare ka shkaktuar dëme në shumë drejtime. ‘Është dëmtuar demokracia parlamentare e Kosovës, ende e brishtë, është dëmtuar imazhi i Kosovës te partnerët ndërkombëtarë dhe te qytetarët, me praktikën e thyerjes së ligjeve pikërisht në vendin ku miratohen ligjet”, tha ai.
Veseli u shpreh se është humbur kohë dhe energji në një agjendë tërësisht negative dhe depresive, duke lënë anash interesin më primar të qytetarëve të Kosovës: zhvillimin ekonomik, duke lëkundur, në të njëjtën kohë, partneritetin me miqtë dhe mbështetësit e shtetit tonë, në krye me Shtetet e Bashkuara të Amerikës dhe vendet tjera perëndimore.
“Vitin që po vjen duhet të bëjmë të kundërtën e këtij bilanci negativ. Pra, jo bllokadë e pozicione rigjide, por dialog në mes pozitës dhe opozitës, për të gjitha shqetësimet e ngritura, dilemat dhe dyshimet. Jo argumente të forcës fizike, por fuqi të argumenteve politike në Kuvendin e Republikës së Kosovës, jo qëndrime arrogante karshi partnerëve ndërkombëtarë, por thellim i partneritetit me ta”,- deklaroi Veseli.
Kreu i Kuvendit bëri të ditur se vizioni është integrimi euro-atlantik, ndërsa partneriteti i Kosoës është bota perëndimore. Ai shtoi se dëshmia më e mirë e kësaj janë liria, pavarësia dhe shtetndërtimi.
Duke folur për raportet e Kuvendit me mediat dhe publikun në përgjithësi, kryetari Veseli theksoi se që në fillim të punës së tij si kryetar i Kuvendit, është udhëhequr nga platforma e transparencës parlamentare./tesheshi.com/
