Krahas humbjes së ndeshjes me Serbinë, ditën e djeshme, Shqipëria pësoi edhe një humbje tjetër. I kandiduar për çmimin Nobel në letërsi, Ismail Kadare nuk arriti të kurorëzonte këtë gëzim, pasi trofeun e mori gazetarja dhe shkrimtarja bjelloruse Svetlana Alexievich, e cila u vlerësua për ‘veprat e saj polifonike, një monument ngritur vuajtjes dhe kurajës në ditët e sotme”.
Mes shkrimeve të saj, ato me më shumë sukses kanë qenë “Lutje për Çernobilin”, “Të mrekulluar nga vdekja”, “Fëmijët prej zinku” dhe “Kohë e dorës së dytë. Jeta në Rusi pas rënies së komunizmit”.
E lindur më 31 maj të vitit 1948 në qytetin ukrainas të Ivano-Frankivsk, nga një baba bjellorus dhe një nënë ukrainase, Svetlana Alexievich nisi karrierën e saj si mësuese dhe më tej si gazetare, duke studiuar në Universitetin e Minskut nga viti 1967 deri në vitin 1972.
Alexievich ka treguar ngjarjet kryesore në Bashkimin Sovjetik pas Luftës së Dytë Botërore. Shkrimet e saj janë veçanërisht kritike në drejtim të regjimit bjellorus, shtet në të cilin është ndaluar publikimi, ndërsa janë përkthyer në mbi 40 gjuhë.
Tejet e emocionuar kur i dhanë çmimin Nobel, ajo tha: “Provova një ndjenjë shumë të komplikuar. U ndjeva e rrethuar nga hije të mëdha si Bunin apo Pasternak. Është një ndjesi nga njëra anë fantastike dhe nga ana tjetër shqetësuese”.
Ajo shtoi gjatë një konference për shtyp në Minsk: “Nuk më pëlqen 84% i rusëve që nxisin vrasjen e ukrainasve, më pëlqen bota ruse e letërsisë dhe e shkencës, por nuk respektoj botën ruse të Putinit dhe të Stalinit”. Shkrimtarja e ka cituar si një okupim ndërhyrjen ruse në Ukrainë.
Në vitin 2014, çmimi Nobel për Letërsinë iu dha shkrimtarit francez Partick Modiano./tesheshi.com/
