“Grekët e duan Shqipërinë, shqiptarët e duan Greqinë. Pjesa tjetër është vetëm politike” – ka qenë kjo aksioma e prodhuar së fundi nga kryeministri Rama, gjatë një interviste me drejtorin e përgjithshëm të agjencisë greke të lajmeve, ANA-MPA, Michalis Psilos, në kuadër të konferencës “Neës agencies vs Fake Neës”, raporton ATSH.
Pak javë pas ngjarjes që pati si protagonist shtetasin minoritar Kostandinos Kacifas, i ekzekutuar pas një lufte disaorëshe me policinë shqiptare, Rama është përpjekur të tregojë se ai, politika e tij, por dhe shqiptarët, nuk ushqejnë asnjë ndjenjë armiqësie ndaj fqinjit jugor, porse jo gjthnjë shkojnë mirë.
“Kjo është një marrëdhënie historike dhe tradicionale fqinjësie dhe siç ndodh gjithmonë me fqinjët, jo çdo gjë shkon gjithmonë mirë. E dimë këtë nga fqinjët tanë, me çdo fqinj tonin, qoftë në fshat apo në qytet, është gjithmonë e njëjta gjë”, theksoi Rama, cituar nga ATSH, që gjithsesi shpalosi kredon e një fqinjësie të mirë e të paqtë.
“Ne jemi shumë të gatshëm të përmirësojmë këtë marrëdhënie ditë pas dite dhe ne po e bëjmë këtë”, theksoi shefi i qeverisë.
“Ndonjëherë ka edhe gjëra për të ardhur keq dhe ne duhet të merremi me to, por e rëndësishme është që mes popujve tanë nuk ka armiqësi”, theksoi Rama.
Sa i përket ngecjes së negociatave, kryeministri shqiptar ka bërë me dije se së shpejti do të takohet me homologun Tcipras, për t’i vënë vulën erës së re të pretenduar, në raportet mes dy vendeve. /tesheshi.com/
