Tashmë po profilizohet qartë se Partia Demoratike ka shënuar një humbje të thellë, ndërkohë që Partia Socialiste ka arritur një fitore të qartë.
PD, nëse bashkon votat me LSI-në nuk bën më shumë se 65 deputetë, që do të thotë se nuk janë mazhorancë politike të ngarkuar nga zgjedhësit shqiptarë.
Votuesit, në mënyrë shumë të qartë kanë vendosur në opozitë dy grupe politike: Partinë Demokratike dhe Lëvizjen Socialiste për Integrim, duke i dhënë PS-së dhe Edi Ramës timonin që ai nuk rreshti së kërkuari çdo ditë të fushatës elektorale.
Po cili është mesazhi politik i dy opozitave që ka emëruar populli shqiptar dje?
Kjo përbën realisht “nyjen gordiane” të procesit politik në Shqipëri pas çertefikimit të rezultatit.
Kjo pasi vendin e presin një sërë procesesh, që nga hyrja e Ilir Metës në Presidencë, emërimin e qeverisë së re, zgjedhjen e krerëve të institucioneve të reja të drejtësisë, kreun e shërbimit sekret shqiptar etj.
Rastësia institucionale e zgjedhjeve politike me zgjedhjen e Presidentit të Republikës ka lënë hapur një sërë punësh që duhen kryer shpejt, për arsye se disa institucioneve kushtetuese iu mbaron mandati. I pari është ai i Kryeprokurorit të Republikës, Adriatik Llalla.
Edi Rama i vetëm nuk i ka 84 votat e duhura për emërimet kushtetuese, e as për reformat e mëdha.
Por ai ka firmosur një pakt me Lulzim Bashën për të vijuar reformat konstitucionale edhe pas 25 qershorit.
Një pakt që garanton në mënyrë të qetë një destinacion të Shqipërisë drejt Bashkimit Europian si një vullnet jo thjeshtë i shumicës por edhe i opozitës.
Por zëra kundërshtarë brenda PD-së, një pjesë e të cilëve ndodhen pranë ish-kryeministrit Sali Berisha, po fajësojnë pikërisht paktin mes Edi Ramës dhe Lulzim Bashës si shkaktari i katastrofës së PD-së, duke parathënë kështu një anulim të tij.
Nga ana tjetër, Ilir Meta nuk e njeh fare këtë pakt.
Ka gjasa që nëse largohet Lulzim Basha, një faktor pranë dyshes Berisha-Meta të vijë në PD, që të formojë më pas një opozitë të fortë; e që me Presidencën që e ka Meta mund të kthehet në një pol i fuqishëm që do të kërkojë të shkruhen rregulla të reja për lojën në vend, duke fshirë të gjitha ç’u vendosën në natën e 17 majit në zyrat e kryesisë së Kuvendit.
Lulzim Basha ka për të folur vetëm këto ditë dhe sipas gjasave ai do të mbajë përgjegjësi politike për zgjedhjet, siç e ka thënë paraprakisht.
Por gjithsesi, ai ka një pakt të parashkruar me amerikanët dhe europianët, që sipas gjasave nuk mund të prishet aq kollaj. Aq më shumë që Basha këtë herë do të jetë edhe në Parlament, duke pasur të gjitha mundësitë që të jetë lideri i demokratëve në Kuvend, pasi nga deputetët e zgjedhur, nuk ka ende ndonjë figurë që mund ta rivalizojë.
Edhe Bregu apo Selami që mund ta rivalizojnë në garën e brendshme që do të zhvillohet në 14 korrik, nëse fitojnë mbi Bashën(nuk ka shumë gjasa) gjithsesi ata janë në një linjë politike drejt zbatimit të marrëveshjes Basha-Rama.
Ky pakt mund të “vdesë” vetëm nëse në krye të selisë blu do të ngjitet një grup i njëjtë me qëndrimin e Berishës dhe Metës në lidhje me reformën në drejtësi. Atëherë gjërat do të rinisnin nga fillimi. Por të gjithë këtë nyjë do të duhet ta zgjidhë Lulzim Basha, bashkëautori i marrëveshjes që u konsiderua si historike për vendin dhe u përgatit me mbështetjen e plotë të SHBA-së dhe Gjermanisë. /tesheshi.com/
