Ka ende shpresë se Mikael Shumaker mund të riaftësohet pas aksidentit fatal që pësoi. Pavarësisht një lloj “black out”-i mediatik që rrethon kurimin e tij, mediat gjermane kanë njoftuar se pasi ka kaluar fazën e rikthimit të gjendjes koshiente, për shkak të dobësisë fizike, Shumaker mund të zhvendoset në një klinikë në Shtetet e Bashkuara të Amerikës.
Për 48-vjeçarin që pësoi dëmtime serioze në tru, gjatë aksidentit të vitit 2013, është lëvizja e parë nga spitali i Grenobëllit në Francë. Revista gjermane “Bravo” raporton se për shkak të dobësisë fizike që shfaq, familjarët kanë vendosur ta dërgojnë në një klinikë në Teksas, për tu ndjekur nga një ekspert i problemeve në tru, i cili do të përpiqet të rikthejë normalitetin në organizmin e legjendës së Formula 1. “Ne kemi eksperiencë të thelluar me traumat në kokë.
Ndoshta asnjë klinikë në Europë, nuk përballon dot rastet që ne trajtojmë”, mësohet të jetë shprehur Dr. Mark Miks, mbi këtë cështje. Shtatë herë kampioni i botës në Formula 1, Mikael Shumaker po pushonte me familjen e tij në Alpet Franceze, në 29 dhjetorin e 2013-ës, kur pësoi një goditje të rëndë në kokë, ndërsa ishte duke bërë ski siç bënte çdo ditë.
Që prej asaj kohe, familja vendosi që çështje të mos mediatizohej dhe shumë pak informacion është bërë publik për opinionin. Më i fundit prej tyre, mbërriti nga zëdhënsja e familjes, e cila deklaroi muaj më parë, se Mikael ka shfaqur shenja zgjimi dhe gjendje ndërgjegjësimi. Që prej ditës së aksidentit dhe deri më sot, thuajse e gjithë bota sportive, pa dallim sporti dhe kombësie, kanë shprehur solidaritet për legjendën e Formula 1, duke besuar se Shumaker do ta fitojë edhe “garën” më të vështirë të jetës së vet. /tesheshi.com/
