Kritikat ndaj veprimeve të Papa Françeskut, nga reformat e tij në politikën e jashtme, janë intensifikuar që nga vdekja e paraardhësit të tij Benediktit XVI, duke zbuluar një klimë të “luftës civile” në Vatikan në një kohë kur po zhvillohet një debat global për të ardhmen e Kishws Katolike, shkruan agjencia franceze e lajmeve AFP.
Benedikti, një teolog konservator gjerman, i cili ishte papë për tetë vjet përpara se të dilte në pension në 2013, vdiq më 31 dhjetor në moshën 95-vjeçare.
Disa ditë pas vdekjes së tij, bashkëpunëtori i tij më i ngushtë Georg Gaenswein zbuloi shqetësimet e Benediktit për disa nga ndryshimet e paraqitura nga pasuesi i tij, Papa Françesku, veçanërisht vendimi i tij për të kufizuar përdorimin e meshës latine.
Kritikat nuk ishin të reja. Shumë në krahun konservator të Kurisë Romake, që drejton Kishën, janë ankuar prej kohësh se Papa argjentinas është autoritar dhe tepër i fokusuar në çështjet baritore në kurriz të ashpërsisë teologjike.
Pas vdekjes së kardinalit australian George Pell në janar të këtij viti, u zbulua se ai ishte autori i një memoje anonime të botuar vitin e kaluar që sulmonte drejtpërdrejt Papa Françeskun.
Memoja e përshkruan papatin si një “katastrofë” dhe kritikon, ndër të tjera, “dështimet e rënda” të diplomacisë së Vatikanit nën mbikëqyrjen e tij.
Pell, një ish-këshilltar i ngushtë i Franceskut, u burgos për abuzim seksual të fëmijëve përpara se të lirohej në vitin 2020. Më pas, në fund të muajit, kardinali gjerman Gerhard Mueller botoi një libër që i shtoi benzinë zjarrit.
Ish-kreu i Kongregatës së fuqishme të Vatikanit për Doktrinën e Besimit dënoi “konfuzionin doktrinor” të Françeskut dhe kritikoi ndikimin e “rrethit magjik” rreth tij.
Libri i Muellerit ka shkaktuar hutim tek disa brenda Vatikanit.
“Kur pranoni kapelën e kardinalit, pranoni të mbështesni dhe ndihmoni Papën. Kritika bëhet privatisht, jo publikisht”, tha një zyrtar i lartë në Sekretariatin e Shtetit të Vatikanit.
Vetë Papa Françesku u tha gazetarëve të dielën e kaluar në avionin e tij në të kthyer nga Sudani i Jugut se kritikët e tij kishin përdorur vdekjen e Benediktit për të çuar përpara qëllimet e tyre.
“Dhe ata që përfitojnë nga një njeri kaq i mirë, një njeri i tillë i Zotit… mirë, unë do të thoja që janë njerëz jo etikë, janë njerëz militantw, jo njerëz të kishës”, tha ai.
Eksperti italian i Vatikanit, Marco Politi tha se libri i Mueller është “një fazë e re në përshkallëzimin e pandalshëm të kundërshtarëve të Papës”.
“Ka një luftë civile në zemër të Kishës që do të vazhdojë deri në ditën e fundit të papatit,” i tha ai AFP.
Tensionet po rriten ndërsa Kisha Katolike kryen konsultime të gjera globale për të ardhmen e saj, “Sinodin mbi Sinodalitetin” e nisur nga Papa Françesku në vitin 2021.
I projektuar për të decentralizuar qeverisjen e Kishës, ai zbuloi, për shembull, dallimet kryesore me Kishën Katolike Gjermane, e cila tregon shumë më tepër prirje për reforma sesa Roma.
Debatet përfshijnë gjithçka, nga vendi i grave në Kishë deri tek mënyra se si të trajtohet skandali i abuzimit seksual të fëmijëve, nga fakti nëse priftërinjtë duhet të martohen deri tek mënyra se si Kisha i trajton besimtarët LGBTQ.
“Me sinodin, i cili duhet të përfundojë në vitin 2024, do të shohim peshën e rrymave të ndryshme brenda Kishës”, tha Politi.
Ai tha se kritikët e Papa Françeskut po mblidheshin tashmë në një “rrymë opinioni të aftë për të ndikuar në konklavën e ardhshme” dhe kështu në papatin e ardhshëm. Konklava, një mbledhje globale e kardinalëve, do të thirrej nëse Françesku vdes ose jep dorëheqjen.
Papa tha se do të ishte i gatshëm të ndiqte shembullin e Benediktit dhe të jepte dorëheqjen nëse shëndeti i tij e pengonte atë të kryente detyrat e tij papale.
Pavarësisht nga problemet e gjurit që e kanë mbajtur në karrige me rrota gjatë muajve të fundit, ai është ende aktiv dhe drejton Kishën dhe është jashtëzakonisht i popullarizuar në mbarë botën, siç dëshmohet nga turmat gjatë udhëtimit të tij të fundit në Afrikë.
“Ky gju është i lodhshëm, por unë po vazhdoj, qetësohu dhe do të shohim,” tha 86-vjeçari të dielën, duke bërë shaka: “Ju e dini se bariu i keq nuk vdes kurrë!” /tesheshi.com/
