Një histori prekëse dhe solidariteti e cila vjen nga Shtetet e Bashkuara të Amerikës, por që falë fuqisë së rrjeti po përfshin të gjithë botën. Kjo është historia e 32 vjeçarit Daniel Fleetwood, i cili është prekur nga një tumor që është duke e ‘ngrënë’ në mënyrë të ngadaltë. I mbërritur tashmë në stadin final, për djaloshin thuajse nuk ka më asgjë për të bërë. Sipas mjekëve metastazat janë shpërndarë në 90% të mushkërive të tij. Daniel është një fans i zjarrtë i “Star Wars” dhe pikërisht për këtë bëhet fjalë në histori…
Saga e krijuar nga George Lucas ka pasionuar prej kohësh Danielin i cili tashmë ka një ëndërr, për të cilën nuk e di nëse do të mund të realizohet, për shkak të sëmundjes së tij. Ai do që të arrijë të shikojë episodin e shtatë të Star Wars, i cili pritet të dalë në kinema më 18 dhjetor.
“Duke gjykuar nga shpejtësia me të cilën sëmundja ka përparuar gjatë dy muajve të fundit nuk besoj se koha na pret deri në dhjetor”,- rrëfen Fleetwood. Ai ka shtyrë bashkëshorten e tij Ashely të lançojë një iniciativë, e cila brenda shumë pak kohësh u bë virale. Gruaja krijoi hashtagun #ForceForDaniel, çka i bën një apel Disney dhe LucasFilm që t’i mundësojnë Danielit të shikojë serinë e ardhshme të filmit, përpara se të jetë shumë vonë për të.
Brenda shumë pak ditësh, hashtagu në Twitter u shpërnda në të katër anët e planetit, në çdo pjesë të botës, duke i këkuar shtëpisë kinematografike të bëjë realitet ëndrrën e Danielit.
Surpriza qëndron në fatin se kërkesës së të riut i janë bashkuar edhe aktorë të filmit si Mark Hamill, i cili do të interpretojë personazhin Luke Skywalker si dhe John Boyega, në rolin e Finn, një personazh i ri. Pra, të gjithë janë bashkuar për këtë kërkesë ndaj Disney. Filmi nuk është përfunduar ende dhe mungojnë disa detaje deri në përfundimin e efeteve speciale, por shpresa që ky apel të mbërrijë në Hollywood dhe që ky djalë të realizojë ëndrrën e tij të fundit, nuk është shuar ende./tesheshi.com/
