Kampionët e Italisë humbën një finale europiane, humbën trofeun më me prestigj, por mijëra njerëz në Torino rrezikuan të humbasin jetën nga paniku i kapluar prej shpërthimeve të fishekzjarreve.
Një turmë prej rreth 30.000 tifozësh të Juventusit, mbledhur në sheshin “San Carlo” për të ndjekur drejtpërdrejt nga ekrani ekipin e zemrës, u përfshi në minutat e fundit të ndeshjes nga paniku teksa plasja e një fishekzjarri u përcoll si një shpërthim.
Të dalë jashtë kontrollit nga frika, tifozët juventinë u përpoqën rrëmbyeshëm ta linin sheshin, duke u penguar në njëri-tjetrin; një situatë kaotike me shumë të lënduar.
La Gazzetta dello Sport njofton për 1.400 të lënduar, tetë prej të cilëve në gjendje të rëndë, posaçërisht njëri prej tyre, një fëmijë shtatë vjeç e gjysmë.
Sheshi do të kthehej në një grumbull mbetjesh, këpucësh e çantash, të lëna në ikje e sipër.
Incidenti risolli në kujtesë tragjedinë e Hejselit në 1985-n, ku dhjetëra tifozë, shumica prej të cilëve italianë, do të humbisnin jetën në prag të një finaleje europiane midis Juventusit dhe Liverpulit. /tesheshi.com/
