Totenhemi ka bërë deri më tani një kampionat të admirueshëm, por nëse kërkon të fitojë titullin nuk ka alternativë tjetër sot, veçse të fitojë ndaj Liverpulit, edhe pse do të luajë në “Anfield”.
Lestëri e kryeson kampionatin anglez me 66 pikë, pesë më shumë se Totenhemi i vendit të dytë, çka e bën dështim çdo rezultat tjetër veç fitores sot për këtë të fundit ndaj Liverpulit.
Shifrat nuk janë shumë inkurajuese për Totenhemin, që ka vetëm katër fitore në 69 takimet e fundit në fushën e Liverpulit.
Këtë kërkon të shfrytëzojë trajneri i Liverpulit, Jurgen Klopp, që e kalon presionin në anën e Totenhemit.
Ja se çfarë thotë ai: “Ky është një viti i mirë për t’u bërë kampion. Askush nuk e di se çfarë do të ngjasë me Totenhemin vitin tjetër, nëse do të largohen lojtarë apo jo. Këtë vit ata kanë një situatë të mirë. Mbase për Totenhemin është si një finale. Ata duhet të fitojnë për ta vënë Lestërin nën presion.”
Klopp e mbyll kështu fjalën e tij për takimin e sotëm: “Kur Totenhemi luan kundër Liverpulit, ka një luftë të fortë. Ka për të qenë një takim me intensitet të lartë, dhe ne duhet ta shfrytëzojmë këtë.”
Liverpuli me Totenhemi përballen sot pasdite, në 18:00, në kuadër të javës së tridhjetë e dytë të kampionatit anglez. /tesheshi.com/
