Vizita e parë e Josep Borrell si shef i politikës së jashtme të BE do të jetë në Kosovë – edhe pse qeveria e tij nuk e njeh vendin ballkanik si një shtet të pavarur – shkruan Politico.eu.
Borrell, aktualisht ministër i Jashtëm i Spanjës, foli për Kosovën në një seancë dëgjimore të KE-së ku po bëhej vlerësimi i “përshtatshmërisë” së tij për punën e përfaqësuesit të lartë të BE për çështjet e jashtme.
Borrell është përballur me pyetje në lidhje me atë se si mund të mbikëqyrë një dialog të mbështetur nga BE që synon t’i jap fund “konfliktit të ngrirë” midis qeverive të Kosovës dhe Serbisë, duke pasur parasysh që Spanja nuk e njeh Kosovën.
Disa raporte të mediave kanë thënë se Borrell do të emërojë një të dërguar special për dialog, i cili do të minimizonte përfshirjen e tij të drejtpërdrejtë në këtë çështje.
Por Borrell e bëri të qartë se ai e inkurajon dialogun e bllokuar, dhe e konsideron si një nga përparësitë e tij, shkruan Politico.eu.
I pyetur nëse ai do ta shtyjë Spanjën për ta njohur Kosovën, Borrell tha se “njohja e Kosovës është një kompetencë e shteteve anëtare”.
“Vizita ime e parë do të jetë në Prishtinë”, i tha ai Komitetit të Punëve të Jashtme të Parlamentit Evropian. “Unë kurrë nuk kam qenë në Kosovë, për arsye të mia, por udhëtimi im i parë do të jetë atje”.
“Një gjë është e qartë: Kosova dhe Serbia duhet të arrijnë një marrëveshje. Kjo është gjëja më e rëndësishme. Dhe unë do të bëj çmos për të përmbushur këtë prioritet”, tha ai.
Ai tha nëse BE nuk do të jetë në gjendje të zgjidhë një problem në gjirin e saj, “është shumë e vështirë të besosh që do të jetë një fuqi gjeopolitike”.
Borrell, i cili pritet të konfirmohet në postin e BE-së, gjithashtu tha se ishte i lumtur që Kosova kishte mbajtur “zgjedhje plotësisht demokratike më 6 tetor.
Kujtojmë se refuzimi i Spanjës për të njohur Kosovën është i lidhur me shqetësimet se një hap i tillë do të inkurajojë separatistët katalanas në vend të shtyjnë përpara lëvizjen e pavarësisë së Katalonnjës. /tesheshi.com/
