“Më vranë djalin. Do të ishte më mirë të isha unë”, tha Ivan nga Bucha, aty ku forcat ruse kryen një krim që tronditi botën, deri në krahasim me Srebrenicën në Bosnje, nga mizoria serbe.
Gazetarët e New York Times, fotografi Daniel Berehulak dhe gazetarja Carlotta Gall, vizituan Bucha-n dhe kaluan më shumë se një javë duke hetuar krimin, duke biseduar me të mbijetuarit dhe hetuesit.
Ushtarët rusë u tërhoqën nga Bucha dhe lanë një numër trupash të vdekur në rrugë, bodrume dhe oborre. Shumë civilë u gjetën me plagë me armë zjarri në kokë, disa me duar të lidhura pas shpine. Një trup u gjet i prerë. Gazetarët e NYT përcaktuan vdekjen e 30 civilëve, disa të vrarë në shtëpitë e tyre ose në pyll, ose të djegur në një parking bosh. Më shumë se 100 çanta trupash u varrosën në një varr të përbashkët në varrezat e qytetit.
Mësuesja në pension Ludmila u vra mëngjesin e 5 marsit teksa hapte derën e shtëpisë së saj. Trupi i saj qëndroi aty për më shumë se një muaj. Ludmila jetonte me Ninën, një motër më e vogël me nevoja të veçanta.
Nina u gjet e vdekur në dyshemenë e kuzhinës. Nuk është e qartë se si ajo vdiq. Rruga “Jablonska” e Ludmilës doli të ishte më fatalja. Disa orë pas Ludmilës, djali i Ivanit vdiq po aty. Ivan nuk ka lejuar që të publikohet mbiemri i tij, shkruan NYT. Një burrë me biçikletë është vrarë gjithashtu në rrugën “Jablonska”. Deri më 11 mars, pamjet satelitore treguan se të paktën 11 trupa të pajetë shtriheshin në rrugë dhe trotuare.
Ivan varrosi djalin e tij në kopsht. “Është shumë e vështirë të varrosësh fëmijën tënd”, thotë ai. “Unë nuk do ta uroja këtë armikut tim më të keq.” I ndjeri ka lënë një djalë 8 vjeç dhe një vajzë 1 vjeçe. “Nuk mund ta shikoj nipin tim në sy”, thotë Ivan.
Pasi ukrainasit shkatërruan 20 tanke dhe automjete të blinduara ruse në kolonë, mendohet se rusët u hakmorën në Bucha. Volodymyr Feokistov. 50 vjeç, doli nga shtëpia më 4 mars, te fqinji i tij për bukë, megjithëse nëna dhe vëllai i tij i thanë të mos dilte. Të nesërmen ai u gjet i vdekur në rrugë.
Pas tërheqjes së forcave ruse nga afërsia e Kievit, Volodymyr Shepitko zbuloi se shtëpia e tij ishte grabitur, plot me plehra dhe shishe birre. Në bodrum ata zbuluan trupin e një gruaje me një plagë në kokë. U gjetën afër saj dhe prezervativë të përdorur, shkruan New York Times.
Është një nga shumë rastet e abuzimit ndaj grave, tha për NYT Avokatja e Popullit në Ukrainë, Lyudmila Denisova. Ajo vuri në dukje raste të rënda të dhunës seksuale nga ushtarët rusë në Bucha dhe gjetkë. “Një grup grash dhe vajzash u mbajtën në bodrumin e një shtëpie për 25 ditë. Nëntë prej tyre janë shtatzënë tani. Ushtarët rusë përdorën dhunën seksuale si një armë lufte kundër ukrainasve”, theksoi ajo.
Gjashtë njerëz vdiqën nga uria në një shtëpi pleqsh, thanë varrmihësit për NYT. Pesë trupa u gjetën në bodrumin e një kampi veror për fëmijë të përdorur nga rusët si bazë. Policia gjeti dhe trupat e djegur të pesë anëtarëve të një familjeje në një livadh, mes tyre dy gra dhe një fëmijë. /tesheshi.com/
