Në një betejë të qartë e të ashpër me kryeministrin Rama, presidenti Meta po kalon fundjavën në Shkodër, në një përpjekje të dukshme për të thithur përkrahës e investuar me instrumenta presidenciale në përmisimin e imazhit të tij. Në qytetin verior, ai dekoroi ikonën e futbollit Sabah Bizi.
“Legjendë e fushës së blertë, organizator i përmasave evropiane në historinë e futbollit tonë, personalitet i dashur e i respektuar, si dhe burim frymëzimi për të gjithë brezat e rinj”.
Kjo është një ceremoni që e kemi pritur prej kohësh, sepse ka qenë një kërkesë e hershme e komunitetit shkodran, e kryetares së Bashkisë, por edhe këtyre figurave të jashtëzakonshme të artit e të kulturës si Osman Mula, shumë të tjerë, për t’i dhënë Sabah Bizit titullin e lartë ‘Nder i Kombit’”, tha Meta.
Më pasi, ai pozoi para monumentit të heronjve të Vigut, duke shkruar.
“Sa herë e vizitoj Shkodrën, nuk mund të mos ndalem tek monumenti i 5 heronjve të Vigut” për t’u përulur me respekt e nderim të thellë para jetës e veprës së bijve më të shquar të saj, të Lezhës dhe Mirditës, të cilët dhanë jetën për Çlirimin e Atdheut.
Populli i Shkodrës dhe populli shqiptar nuk do t’i harrojë kurrë bijat dhe bijtë e saj më të mirë, të cilët sakrifikuan gjithçka për Shqipërinë e lirë, sovrane dhe demokratike.
Tradhëtarët dhe gjakprishurit kurrë nuk do t’ia dalin të cënojnë dinjitetin dhe veprën e Heronjve dhe Dëshmorëve të Kombit që ndriçon rrugën tonë drejt së ardhmes së sigurt europiane. I paharruar dhe i përjetshëm kujtimi i 5 heronjve të Vigut dhe i të gjithë Dëshmorëve të Atdheut!”, shkruan Meta. /tesheshi.com/
