Pamjet e reja të djalit sirian që i dha një fytyrë vuajtjeve të popullsisë civile në Halep, kanë kapur sërish vëmendjen e botës. Imazhe të tij dhe një klip i shkurtër tregojnë sesi është Omran Daqneesh për të parën herë që kur ai u plagos nga një sulm ajror i regjimit sirian.
Omran Daqneesh u fotografua në pjesën e pasme të një autoambulnce, sapo ishte nxjerrë nga rrënojat e shtëpisë së goditur nga ajri, i gjakosur dhe me pluhur në fytyrë e rroba, duke u bërë kështu symbol i vuajtjeve të panumërta të civilëve në Halep gjatë rrethimit njëvjeçar të qytetit.
Imazhet u postuan në median sociale të një prezantuesi televiziv pro-sirian dhe duket se tregojnë djalin e vogël në gjendje të mirë shëndetësore, duke jetuar në Halep, që është tani nën kontrollin e forcave qeveritare të Bashar al-Assad.
Ndërsa kryengritësit u tërhoqën nga Halepi, pati zëra se familja Daqneesh kishte kaluar në territorin qeveritar, por nuk kishte asnjë lajm prej tyre deri tani.
Imazhet dhe klipi i postuar nga Kinana Alloush – reporter që dikur postoi edhe një selfie me trupat e pajetë të luftëtarëve – shënojnë herën e parë që Omran shfaqet në rrjet që nga plagosja e tij.
Në intervistën e shkurtër të postuar nga Alloush, babai i Omran tregon se ai nuk i kishte dëgjuar zhurmat e avionëve sipër shtëpisë së tij përpara sulmit dhe se refuzoi të largohej nga Siria edhe pas ofertave të disa palëve që dëshironin të dëmtonin reputacionin e vendit të tij dhe forca të armatosura. Ai tha se ia ndryshoi emrin të birit dhe modelin e flokëve për ta larguar nga individët që kërcënuan ta rrëmbenin dhe akuzon kryengritësit se u përpoqën ta frikësojnë.
Nuk është e qartë nëse familja ka bashkëpunuar me vullnet në realizimin e intervistës. Nuk është hera e parë që regjimi sirian ndëmerr përpjekje dizinformimi, duke u premtuar përfitime dezertorëve apo civilëve të zhvendosur nëse ata flasin hapur kundër krimeve të dyshuara të kryengritësve.
Përgatiti: Juli Prifti – /tesheshi.com/
