Më shumë se 250 mijë civilë, të cilët prej katër vitesh jetojnë nën rrethimin e regjimit sirian në viset rurale të Homsit të Sirisë, janë të privuar nga artikujt më elementarë për jetën.
Problemet më të mëdha me të cilat ballafaqohen banorët e asaj zone janë mungesa e ushqimit,
rrymës elektrike, ilaçeve dhe kushtet shumë të këqija në spitale.
Në anën tjetër, në të njëjtën zonë vazhdojnë sulmet e regjimit sirian dhe deri tani janë vrarë me qindra persona e mijëra tjerë janë plagosur.
Aktivistët thonë se deri tani, për shkak të masave të ashpra të regjimit sirian, vetëm në raste shumë të rralla u lejohet ofrimi i ndihmës humanitare në zonë. Gjatë vitit të kaluar vetëm dy herë është lejuar ofrimi i ndihmës humanitare popullatës së rrezikuar.
Tregtarët individualë u ofrojnë gjithë ç’kanë pjesëtarëve të regjimit sirian, në mënyrë që të sjellin ushqim në zonën nën rrethim, të cilin pastaj e shesin me çmime shumë të larta.
Yasir es-Seyyid Ali, i cili jeton në vendin e quajtur El-Havle, ka thënë se për shkak të rrethimit vuajnë shumë njerëz në atë zonë.
“Rrethimi ka ndikuar negativisht në të gjitha sferat e jetës në këtë zonë, veçanërisht pasi regjimi ka mbyllur të gjitha kalimet dhe rrugët”, – ka thënë Yasir es-Seyyid Ali.
Ai ka theksuar se në qytet është shumë vështirë të gjenden artikujt ushqimorë, ndërsa çmimet janë aq të larta, sa shumica e banorëve nuk kanë mundësi të sigurojnë shumicën e artikujve.
“Çmimet janë dhjetë herë më të larta se sa kanë qenë para luftës. Çmimet e naftës poashtu janë rritur”, ka thënë Ali.
Siriani Abdurrahman al-Yasin shprehet se tepër e vështirë është të arrihet deri te ushqimi vetëm sa për të mbijetuar.
“Shumicën e kohës nuk mund të gjejmë ushqimin. Shumica e njerëzve në këtë zonë ndodhen në situatë të njëjtë. Buka më së shtrenjti shitet këtu te ne”, – ka thënë ky sirian.
Sami Alem, i cili punon në spital të El-Havleut, deklaron se rrethimi ka ndikuar shumë negativisht edhe në shëndetin e njerëzve në atë zonë.
“Në spitalin ku unë punoj nuk kemi aparaturë moderne për mjekimin e pacientëve. Na mungojnë ilaçet dhe qeset për gjak. Na mungojnë ilaçet për pacientët me probleme me zemër dhe shtypje të lartë të gjakut. Andaj, na duhet t’u japim pacientëve ilaçe alternative”, – thotë Sami Alem. /tesheshi.com/
