Dhjetra kolonë izraelitë të martën hynë me forcë në kompleksin e Xhamisë Al Aksa në Kudsin Lindor të pushtuar (Jeruzalem) gjatë festës hebraike të Pashkës, sipas dëshmitarëve okularë.
Dëshmitarët okularë thonë se policia izraelite shoqëroi grupe kolonësh në oborrin e Al Aksa-së përmes portës së Mughrabi në murin perëndimor të xhamisë.
Forcat e policisë izraelite u vendosën në oborrin e xhamisë përpara bastisjes, ndërsa disa oficerë u ngjitën në çatinë e sallës së lutjeve Al-Qibli.
Më herët, policia izraelite i pengoi palestinezët nën moshën 50-vjeçare të hynin në xhaminë Al Aksa për t’u falur, thanë dëshmitarët okularë për Anadolu Agency (AA).
Dhjetra palestinezë falën namazin e mëngjesit në rrugët që të çojnë në xhaminë Al Aksa pasi u penguan të hynin në kompleks.
Të hënën, Departamenti i Al-Quds i Vakëfimeve Islame tha se 1,531 kolonë sulmuan Xhaminë Al Aksa gjatë festës hebraike të Pashkës, e cila zgjat deri më 12 prill.
Pasi forcat izraelite sulmuan Al Aksa-në dhe dëbuan besimtarët nga kompleksi i xhamisë javën e kaluar, tensionet në të gjithë territorin palestinez janë rritur. Sulmet izraelite u shkaktuan nga sulmet me raketa nga Rripi i Gazës dhe Libani, të cilave izraelitët u përgjigjën me sulme ajrore.
Palestinezët akuzojnë izraelitët për judaizimin sistematik të Kudsit Lindor, ku ndodhet Al Aksa-ja, vendi i tretë më i rëndësishëm i shenjtë musliman. /tesheshi.com/
