Në kuadër të javës së shëndetësisë Kosovë- Turqi, deri më tani janë realizuar 74 operacione nga ekipi i mjekëve të dy vendeve.
Në mesin e pacientëve që kanë përfituar nga operacioni është edhe një foshnje pesëmuajshe, e cila është operuar në kardiokirurgji, e që shënohet si rasti i parë i operuar në Kosovë.
Për t’u njohur nga afër në lidhje me punën që po bëhet nga ekipi i mjekëve nga Turqia dhe mjekëve të QKUK-së, zhvilloi një vizitë edhe ministri i Shëndetësisë, Imet Rrahmani me bashkëpunëtorë.
Ai tha se operacionet kanë shkuar pa komplikime, dhe se operacionet do të ndikojnë në rritjen e cilësisë së shërbimeve shëndetësore dhe në dobi të edukimit të vazhdueshëm të stafit shëndetësor.
Ndryshe, ky është viti i katërt me radhë që organizohet ky bashkëpunim në fushën e shëndetësisë derisa janë kryer qindra operacione. /tesheshi.com/
