Jakup Krasniqi, më emicionali ndër katër krerët e UÇK-së në Hagë, në mbrojtjen e tij në proces, i kujtoi trupit gjykues se kush ishin serbët kundër të cilave ai luftoi, sigurisht, pa bërë ndonjë krim ndër civilë, siç pretendohet në akuzë.
“Sapo përfundoi lufta, regjimi komunist i Jugosllavisë imponoi administrimin ushtarak në Kosovë dhe pa proces gjyqësor ekzekutoi mijëra shqiptar.
Gjendja vazhdoi deri në korrik të vitit 1945 kur Kuvendi i Prizrenit u vendos që Kosova t’i aneksohej Serbisë.
Dua të theksoj se që në fëmijërinë time kam qenë i rrethuar me njerëz që i kanë mbijetuar gjenocidit të Serbisë, familjarët e të cilëve ishin vrarë, burgosur, u ishin shkatërruar shtëpitë dhe u ishin marrë pronat.
Kur isha 5-6 vjeç në vitin 1956, regjimi komunist filloi një valë të re të dhunës. Babai im ishte viktimë e kësaj dhune.
Më kujtohet që sot kur babai im u kthye në shtëpi i rrahur për vdekje dhe në një qoshe të shtëpisë nëna ime mundohej të ja lehtësonte dhimbjen e torturës njerëzore. Babai im ka qenë i përndjekur dhe ka përjetuar trauma të mëdha. Burgosja ime ishte shumë e vështirë për të”, tha ish-zëdhënësi i UÇK-së.
“Është absurde që të akuzohem për persekutimin e anëtarëve të Lidhjes Demokratike të Kosovë. Unë vetë isha anëtar i saj së bashku me familjarët e mi. Tërë jetën më ka shoqëruar toleranca ndaj mendimit ndryshe.
Po ju përmend një shembull që nxjerr në shesh të pavërtetat e pretendimeve të një akuze të tillë: vëllai im ka qenë anëtar i LDK. Në zgjedhjet e organizuara pas luftës, vajza e tij u zgjodh anëtar në Asamblenë Kombëtare të Drenasit.
Pas përfundimit të luftës kemi vepruar në parti të veçanta, por unë ruaj respektin për anëtarët e LDK-së. Përpjekjet për të gjetur një zgjidhje paqësore për Kosovën dështuan për shkak të regjimit të Beogradit që kishte përgatitur një plan gjenocidial.
Kur filloi lufta forcat e armatosura të Serbisë, ndërmorën ofensiva kundër vendbanimeve shqiptare duke masakruar, gra fëmijë dhe pleq e çdo gjë që ishte e lidhur me identitetin e shqiptarëve”, u mbrojt Krasniqi, duke vijuar:
“Nuk e kuptoj logjikën e akuzës së tanishme kundër meje. Ndaj popullit tonë u ushtrua dhunë sistematike. Kishte burgosje, vrasje e dhunë.
Unë nuk kam qenë i përfshirë asnjë herë në asnjë vrasje, asnjë burgosje, dhe asnjë formë presioni ndaj kujt do qoftë. E kam pasur të qartë se cilat mjete duhet të përdoren për realizimin e çlirimit kombëtar në luftë kundër atyre që zbatuan gjenocid ndaj nesh”, tha ai. /tesheshi.com/
