Hyka ka bërë një tjetër paraqitje të shkëlqyer në kampionatin zvicerian. Lucerna, ekipi ku ai aktivizohet, ka pritur sot Bazelin, ekipin kryesues.
Ish-lojtari i përfaqësueses kuqezi ka shënuar dy gola për vendasit. Hyka ka barazuar fillimisht rezultatin në minutën e 18-të, pasi Bazeli kishte kaluar në epërsi që në nisje të lojës.
Goli i dytë i shqiptarit do të vinte në minutën e 30-të, duke i dhënë avantazhin Lucernës. Por ky avantazh do të ruhej gjer në minutën e 70-të, pas së cilës Janko do të realizonte dy herë për Bazelin.
Skuadra ku aktivizohet Taulanta Xhaka do të fitonte 2-3, për të qëndruar në krye të renditjes me 9 pikë pas tre javësh.
Fitorja e Bazelit nuk e zbeh aspak paraqitjen mbresëlënëse të Jahmir Hykës, që veç një javë më parë do të bënte një paraqitje të njëjtë, duke shënuar një gol, e duke patur rol të drejtpërdrejtë në të tre golat e tjerë të Lucernës.
Ky ishte goli i tretë i Jahmir Hykës në Superligën zviceriane pas vetëm tre javësh kampionat. Listën e golashëneusve e kryeson braziliani Caio i Grasshoperit, me katër gola të shënuar. /tesheshi.com/
