Pse nga Rusia klikohen me mijëra herë portalet e të dhënave në Shqipëri?! Ajsbergu është më shumë nën ujë se sa mbi ujë, por përplasja me të mund të jetë e rrezikshme…
Lufta e ftohtë SHBA-Rusi si dhe më parë e gjen sheshin e betejës në Evropën Lindore dhe Ballkan. Vendet e varfëra dhe me shumë probleme në vendosjen e demokracisë, me klasë politike të korruptuar, janë të tejlodhur në rrugën e pritjes për t’u anëtarësuar në Bashkimin Europian, kështu që shihen si pre më të lehta për t’u ndikuar nga Rusia.
Kryeministri shqiptar Edi Rama e ka deklaruar hapur frikën se Rusia mund të ndikojë në Ballkan nëse Brukseli nuk hap derën shpejt për Shqipërinë e vendet fqinje.
Po pavarësisht kësaj deklarate, si mund ta masim interesin e “ariut rus” për shqiptarët, të cilët ia kthyen kurrizin Rusisë komuniste 40 vite më parë?!
Një kriter matës është kërkimi i të dhënave për shqiptarët. Interesant është fakti që një nga portalet kryesore të të dhënave për shqiptarët, për qeverisjen, për pasuritë e zyrtarëve, për tenderat etj., OpedataAlbania deklaroi në janar të këtij viti se vendi i dytë nga i vijnë më shumë klikime pas Shqipërisë ishte Rusia. Dhe ky interes ishte shfaqur vetëm në muaj e fundit të vitit që shkoi.
“Nga cili shtet klikohen të dhëna të hapura për Shqipërinë, Prokurimet, Shpenzimet, etj.? 8.7% e atyre që vizitojnë web-in www.opendata.al janë në Rusi. Ky është vendi i dytë për klikime tek web sipas shteteve. Ndërsa për faqen www.spending.data.al vendi i dytë me 5% është USA. Edhe tek www.openprocurement.al vendi i dytë i klikimeve me 3% është po Rusia”- shkruan Aranita Brahaj, gazetare, anëtare e projektit Opendata. Ajo sqaron në një status në facebook se vetëm në një muaj ka 3 mijë klikues unikë nga Rusia”.
Open Data Albania është një iniciativë që promovon principet e të Dhënave të Hapura (Open Data). Projekti grumbullon të dhëna nga zyrat publike mbi indikatorë socialo-ekonomik, t´i përpunojë dhe publikojë këto të dhëna bazuar në teknologjitë më të fundit të informacionit.
Më të shikuarat nga Rusia ishin të dhënat që kishin të bënin me projektin që kishte të dhënat për prokurimet publike të pushtetit vendor.
Por në këtë portal, i cili mbështetet nga ambasada e SHBA-së dhe partnerë të tjerë europianë, gjen çdo lloj të dhëne tjetër: që nga pasuritë e funksionarëve të lartë shtetërorë, pagesa të institucioneve buxhetore, shpenzime të subjekteve elektorale dhe kompanive konçesionare, të dhëna mbi kriminalitetin, etj..
Pra këtu mund të gjendet gjithçka që ka të bëjë me mënyrën si funksion shteti.
Gjithë ky interes për të dhënat shqiptare e çon ujin tek ajo që po ndodh nën rogoz dhe që i frikësohet edhe Brukseli: ndikimi i Rusisë në kundërshtim me linjën e integrimit europian të këtyre vendeve, një gjë kjo e pranuar së fundmi për herë të parë dhe nga Këshilli i Ministrave të BE-së.
Mbetet për t’u parë se si do t’a trajtojë Shqipëria këtë situatë, ku ajsbergu është më shumë nën ujë se sa mbi ujë, por përplasja me të mund të jetë e rrezikshme. /tesheshi.com/
