Shumëkush beson se puna me orare të zgjatura shpërblehet me rritje rroge, por jo gjithmonë ndodh kështu. Një studim tregon se femrat të cilat punojnë për një kohë të gjatë më shumë se 40 orë në javë, rrezikojnë të preken nga një sërë sëmundjesh, që çojnë në vdekje të parakohshme.
Puna me orare të tejzgjatura rrit rrezikun e diabetit, artritit e sëmundjeve të zemrës. Femrat janë ato që preken më shumë, krahasuar me meshkujt, tek të cilët orët shtesë në punë nuk kanë ndikim serioz në shëndet.
Kjo shpjegohet me faktin se përveç punës, femrat kanë shumë më tepër angazhime në shtëpi, në rritjen dhe kujdesin e fëmijëve dhe në këtë mënyrë janë më të ekspozuara ndaj stresit dhe gjendjes së rënduar mendore.
Pas publikimit të këtij studimi, mjeku që e ka kryer atë ka bërë apel për të gjitha femrat që kalojnë shumë orë në punë: “Ju mund të vazhdoni ende të punoni kaq shumë, por fakti është që e keni vetë në dorë nëse doni të gëzoni shëndet të mirë”. /tesheshi.com/
