Ja për kë Zaev nuk ua besoi shqiptarëve dy institucione sigurie

Qeveria maqedonase vendosi që Drejtor i ri i Byrosë për Siguri Publike në Maqedoni të jetë Llaze Vellkovski, i cili vjen në pozicionin e drejtorit të deritanishëm të shkarkuar Mitko Çavkov, ndërsa i Drejtorisë për Siguri dhe Kundërzbulim të jetë Goran Nikollovski, i cili vjen në pozitën e drejtorit të shkarkuar Vladimir Atanasovski.

“Në seancën qeveritare është konstatuar se drejtorët e sapoemëruar, Vellkovski dhe Nikollovski, janë zgjidhje cilësore ekspertësh me përvojë shumëvjeçare në këtë sferë, të cilët nuk kanë qenë dhe nuk janë anëtarë të partive politike. Është shfaqur bindja se Velkovski dhe Nikollovski me sukses do të përgjigjen në përgjegjësitë e të dy organeve të rëndësishme për sigurinë, që funksionojnë pranë MPB-së, në pozitat udhëheqëse të së cilës janë vendosur, duke pasur parasysh se paraprijnë reforma serioze në MPB dhe në shërbimet sekrete, në pajtim me vërejtjeje e Raportit të grupit të ekspertëve të KE-së, të udhëhequr nga Rajnhard Pribe”, thuhet në deklaratën e qeverisë së Maqedonisë.

Kështu, institucionet kyçe të sigurisë nacionale, Drejtoria për Siguri dhe Kundërzbulim, si dhe Byroja për Siguri Publike, do të vazhdojnë të udhëhiqen nga kuadro maqedonas, ndërsa shqiptarët duhet të pajtohen vetëm me rolet e zëvendësve në këto dy drejtori.

Sipas disa informacioneve, BDI do të vazhdojë të ketë zëvendësin në DSK, ndërsa Aleanca për Shqiptarët do të ketë zëvendësin në Byronë për Siguri Publike, por që ende nuk kanë vendosur për emra konkreët. Në dy drejtoritë tjera të rëndësishme, siç janë Drejtoria e Policisë dhe Drejtoria e Burgjeve, nuk përjashtohet mundësia që drejtorët të jenë shqiptarë, të propozuar nga BDI dhe ASH.

Nga ana tjetër, jo vetëm nga LSDM, por edhe nga partitë shqiptare, pritjet e ndërkombëtarëve janë që të kësaj radhe në të gjitha organet e sigurisë të mos vijnë emra partiakë, por emra të dëshmuar profesionalisht dhe të pastër moralisht.

Për drejtorët e shkarkuar Çavkov dhe Anastasovski, theksohet, është konstatuar se kanë marrë pjesë në aktivitete të palejuara dhe të kundërligjshme kundër shtetit. /tesheshi.com/