Nga Blendi Gashi
Sistemi i drejtësisë në Kosovë ka vite që është në vdekje klinike, ku politikanët e korruptuar hedhin vallen, ndërsa ata që duhet t’i ndjekin, pra drejtuesit e prokurorive dhe gjykatave në vend që t’i çojnë prapa grilave të gjithë ata që nuk mund të arsyetojnë pasurinë që mund ta kenë fituar në mënyrë të paligjshme, dalin pa asnjë problem të bëjnë qejf në kafe duke u zgërdhirë, gjë që është dëshmuar disa herë.
Edhe në deklarimin e fundit të pasurisë, njerëzit që paguhen për ta luftuar korrupsionin e krimin, kanë deklaruar pasuri tejet të majme dhe është vërtet për t’u habitur se si e kanë krijuar atë, ndërsa edhe si çdo vit tjetër nuk e qartësojnë në mënyrën më të mirë prejardhjen e pasurisë.
Duke filluar nga kryeprokurori i shtetit, drejtuesit e Këshillit Gjyqësor e atij Prokurorial, kreu i Anti-Korrupsionit, kanë pasuri marramendëse, banesa, shtëpi, mijëra të hyra vjetore, dy e më shumë paga, para të majme të ruajtura në banka e vetura të shtrenjta.
Portali tesheshi.com ka nxjerrë pasurinë e deklaruar sivjet nga drejtuesit e institucioneve të lartcekura në Agjencinë Kundër Korrupsionit të cilën mund ta lexoni më poshtë.
Aleksandër Lumezi, kryeprokuror i shtetit
Lumezi është një pasanik i vërtetë ku nuk i mungon asgjë. Ai merr pagë vjetore si kryeprokuror në vlerë 20 mijë e 433 euro dhe mëditje në vlerë 1.994 euro.
Po ashtu merr edhe një pagë tjetër nga Bordi i Akademisë Policore në vlerë 800 euro dhe para tjera në vlerë 3.127 euro nga buxheti i shtetit siç thotë për punë intelektuale.
Gruaja e tij si e punësuar në Universitetin e Prishtinës merr një page poashtu të lajme vjetore në vlerë 12 mijë e 888 euro dhe 1 mijë 421 euro tjera si ligjëruese në Kolegjin privat AAB.
Lumezi ka dy banesa, njërën 79 metra katrorë në vlerë 120 mijë euro dhe tjetrën 45 metra katrorë në vlerë 80 mijë euro.
Por siç duket nuk po i pëlqen ambienti i mbyllur në banesa dhe ka filluar të ndërtojë dhe një shtëpi të madhe me sipërfaqe 268 metra katrorë në vlerë 220 mijë euro. Burimi i financimit të shtëpisë ka shkruar se bëhet nga kredia, kursimet, qiraja dhe paga.
Veturë personale nuk ka deklaruar por një veturë në emër të gruas të tipit Opel Corsa në vlerë 6 mijë euro të cilën thotë se e ka blerë nga shitja paraprake e veturës por nuk e ka treguar as tipin as çmimin e saj.
Lumezi posedon edhe 5 piktura në vlerë 15 mijë euro
Në emër personal ka deklaruar para të gatshme të ruajtura në bankë në vlerë mbi 10 mijë euro, kurse në emër të bashkëshortes mbi 7 mijë euro, kurse në emër të fëmijëve 1800 euro.
Ka një kredi në vlerë 60 mijë euro me kohëzgjatje prej 5 viteve të cilën thotë se e ka marrë për ndërtimin e shtëpisë (detyrimet ndaj bankës thotë se i ka zvogëluar për 13 mijë euro)
Po ashtu ka deklaruar dhe qira të banesës në vlerë 6 mijë e 300 euro.
Shaip Havolli, drejtor i AKK-së
Drejtori i Anti-Korrupsionit, agjenci kjo që bën deklarimin e pasurisë së zyrtarëve public poashtu ka një pasuri bajagi të mirë.
Si drejtori i AKK-së për një vit merr pagë në vlerë 13.890 euro dhe mëditje në vlerë 1.073 euro
Pagë të majme vjetore ka edhe gruaja e tij në vlerë 12.308 euro
Posedon banesë 91.96 metra katrorë në vlerë 40 mijë euro që është në emër të tij, kurse poashtu ka deklaruar edhe shtëpi 150 metra katrorë në vlerë 15 mijë euro (pronë e përbashkët)
Si të pasuri të përbashkët ka deklaruar edhe tokë 52 ari në vlerë 16.600 euro, 10 ari mal në vlerë 2 mijë euro dhe truall 14.50 ari në vlerë 10 mijë euro.
E vozit një veturë në vlerë 5.500 euro, kurse ka dhe një kredi në vlerë prej 10 mijë euro me kohëzgjatje viti (2016-2019)
Blerim Isufaj, kryesues i Këshillit Prokurorial
Kryesuesi i KPK-së për dallim nga të tjerët nuk ka dhënë të dhëna të hollësishme të pasurisë.
Në emër personal ka deklaruar truall 4 ari në vlerë 60 mijë euro, tokë të përbashkët në vlerë mbi 200 mijë euro dhe mal në vlerë 5 mijë euro.
Nuk ka deklaruar para të gatshme në banka. Ndërkaq ka deklaruar dy kredi njërën në vlerë 4 mijë euro për tre vite dhe tjetrën në vlerë 49 mijë euro për 10 vite të cilën thotë se e ka marrë për blerje të banesës dhe renovim të shtëpisë.
Ka deklaruar pagën vjetore si kryesues i KPK-së në vlerë 14 mijë e 480 euro si dhe mëditje në vlerë 1.142 euro.
Lavdim Krasniqi, drejtor i sekretariatit të Këshillit Prokurorial
Ashtu si Lumezi edhe Krasniqi ka një pasuri tejet të majme. Merr disa paga, posedon banesë, tokë si dhe para të thata.
Pagën vjetore nga KPK merr në vlerë 14 mijë euro dhe mëditje në vlerë 1 mijë e 561 euro. Pagë sekondare nga Kolegji UBT në vlerë 2 mijë e 10 euro. Poashtu pagë për shërbime profesionale në Institutin Gjyqësor në vlerë 598 euro.
Ka deklaruar se marrë pagesë për shërbime profesionale në institucione e organizata si; nga Oda e Avokatëve në vlerë 900 euro, nga Premium Consulting 1000 euro, nga IMG 1 mijë e 996 euro dhe nga GIZ 1 mijë e 100 euro.
Posedon banesë 59.30 metra katrorë në vlerë 49 mijë e 144 euro e blerë në vitin 2009, tokë 70 ari (e trashëguar nga prindi) në vlerë 21 mijë e 500 euro dhe garazhë dhe depo 20.46 metra katrorë në vlerë 10 mijë e 384 euro e blerë më 2013.
Vozit veturë Audi në vlerë 7 mijë euro.
Kurse para të mbajtura në bankë ka në vlerë 9 mijë e 394 euro.
Albert Aavdiu, drejtor i Këshillit Gjyqësor të Kosovës (KGJK) – (tashmë i dorëhequr)
Tejet i pasur del të jetë edhe tashmë ish-drejtori i KGJK-së. Ai posedon banesë 104 metra katrorë në vlerë 84 mijë e 484 euro të cilën thotë se e ka blerë nga kursime të përbashkëta, poashtu truall 4 ari në vlerë 11 mijë euro (investim i përbashkët familjar)
Vozit veturë të tipit Tiguan por nuk e ka cekur çmimin vetëm ka deklaruar se e ka blerë nga shitja e veturës paraprake, nuk e ka treguar tipin dhe nga kursimet.
Ndërsa ka ara të gatshme në banka 90 mijë euro (përbashkët)
Pagë dhe mëditje ka deklaruar 4.341 euro në emër të vet dhe 2.772 në emër të gruas./tesheshi.com/
