Nga Blendi Gashi
Dy ish-ushtarët e UÇK-së, tani në petkun e politikanëve, njëherit krerëve të partive të tyre, Kadri Veseli (PDK) dhe Ramush Haradinaj (AAK), pas nënshkrimit të koalicionit parazgjedhor, për herë të parë bashkë për të kërkuar vota ja kanë mësyrë qytetit të vogël Rahovecit, banorët e së cilës njihet ndër më punëtorë në vend.
Kështu, Veseli pas disa muajsh ku vet prezantoi para qytetarëve të ashtuqujaturin “turi i dëgjimit”, sot në krah kishte edhe Haradinaj, i cili si kandidat për kryeministër u betua se pas fitores në zgjedhjet e 11 qershorit, menjëherë do nisin të punojnë për të mirë e vendit.
Si Veseli ashtu edhe Haradinaj, para rahovecianëve dhanë premtime tashmë të njohura ndër vite.
Ndërsa Veseli premtoj zhvillim ekonomik dhe integrim të vendit në Bashkim Evropian Haradinaj, duke aluduar në demarkimin e kufirit me Malin e Zi tha se “s’mundmi me falë tokë të këtij vendi”.
Por, ajo që ra në sy në këtë takim është premtimi njëzëri i Veselit dhe Haradinajt për themelimin e ushtrisë, duke premtuar se do jetë prioriteti i parë nëse fitojnë besimin e qytetarëve për të qeverisur vendin.
“Vendimmarrja e parë duhet të jetë transformimi i FSK në ushtri të Kosovës. Kjo është arsyeja pse jam shumë i lumtur të jem sot me mikun tim dhe kryeministrin e ardhshëm Ramush Haradinaj, bashkë do të jemi edhe më 11 qershor ku do të kemi një nga fitoret më të mëdha. Nga data 12 qershor ne do të fillojmë të kryejmë përgjegjësitë tona”, ka thënë Veseli, i cili premtoi se së bashku me Ramushin do të veprojnë dhe marrin vendime që janë në të mirë të vendit.
Kurse Haradinaj, duke folur rreth formimit të ushtrisë ka thënë: “Nuk mundemi ne më si shtetas me qenë të nëpërkëmbur edhe në vendin tonë, edhe jashtë. Duhet me nis ndryshe punën tonë dhe qëllimin tonë. Nuk mundemi ne të gjitha këto resurse që i kemi t’i nëpërkëmbim. Nuk mundemi me gjithë këto pasuri që i kemi gati si mos me i pas. A është në rregull qe të gjithë me na pa si lypës, që nuk dimë çka po lypim? Deri kur ne duhet me lejuar që vendi ynë me mbet peng, ushtria për shembull e paformuar. Ju e dini se si kemi ardhur deri te kjo Kosovë dhe s’mundemi me falë tokë të këtij vendi. Nuk mundemi ne të vazhdojmë në Kosovë të tolerojmë kushdo qofshin ata. Ka raste kur duhet me vepruar edhe kur është i afërm. Kemi plot plagë të luftës, por nuk mundemi ne me qëndruar pa ushtri tonë. Unë e di se moralizojnë shumë sot për këtë vendim, por nëse është në interes të atdheut unë gjithmonë do ta bëj. Atë ditë që ia nisim punës, atë ditë mundemi me thënë ‘Bac, u kry’”.
Pra, siç mund të konkludohet, vendimi i parë që do marrë qeveria “Haradinaj” nëse fiton zgjedhjet do jetë themelimi i ushtrisë e jo Demarkacioni.
Por, asnjëri prej tyre nuk ka folur se si tentojnë ta themelojnë ushtrinë, përmes ndryshimeve ligjore siç tentoi presidenti Thaçi dhe dështoi, apo ashtu si dëshirojnë ndërkombëtarët, pra që të bëhet sipas Kushtetutës dhe me votat e minoritetit serb.
Dhe duke parë kundërshtimin e vazhdueshëm të serbëve për t’i thënë “pro” ushtrisë, Haradinajt dhe Veselit i mbetet t’i bindin përfaqësuesit e ri të serbëve të Kosovës që do dalin pas zgjedhjeve të 11 qershorit. /tesheshi.com/
