Anulimi i protestës nga partitë opozitare, VV, AAK e NISMA, në çastet e fundit përveç qytetarëve, ka befasuar dhe eksponentë të rëndësishëm të këtyre partive.
Paqartësia rreth mbajtjes apo jo të kësaj proteste u rrit, pasi opozita e bashkuar anuloi konferencën e thirrur për media. Pas këtij vendimi, liderët opozitarë së bashku u ulën në një nga lokalet e kryeqytetit për të diskutuar se çfarë të bëjnë më tej.
Pasi konsumuan nga një kafe dhe debateve që zhvilluan, krerët e opozitës dolën në qendër të sheshit ‘Skëndërbeu’ dhe njoftuan opinionin për anulimin e protestës.
Ky lajm ishte aq befasues sa që as drejtues të lartë të opozitës nuk paramenduan se nuk do të mbahej protesta.
Dëshmia më e mirë e kësaj është se deputeti i VV-së Rexhep Selimi, disa orë para anulimit të protestës përmes një shkrimi në profilin e tij në Facebook u bëri thirrje qytetarëve për dalje masive në protestë.
Nga këto zhvillimet lihet të kuptohet që askush nuk e kishte të qartë se çfarë do të ndodhte, dhe vendimi është marrë aty për aty, në takimin e liderëve në mesditë.
Anulimi i protestës e cila u paralajmërua një muaj më parë, siç duket ndodhi pas trysnisë së madhe nga partia e parë opozitare Vetëvendosje e cila në asnjë rrethanë nuk dëshiroi që sot të mbahet protesta.
Vet kreu i AAK-së, Ramush Haradinaj, e pranoi se VV dhe NISMA kërkuan që protesta të shtyhej, siç ka thënë për një moment më të përshtatshëm, por nuk tregoi arsyet kryesore pse e morën një vendim aq të papritur.
Portali mbarëkombëtar tesheshi.com ka kontaktuar analistë politik për të marrë mendimin e tyre se cilat mund të jenë shkaqet kryesore të shtyrjes së protestës nga opozita.
Sipas njohësve të rrethanave politike në vend disa faktorë që kanë shtyrë opozitën të mos e mbajë protestën janë çarjet e fundit mes tyre, veprimet e një anshme, deklaratat e bëra nga përfaqësues të opozitës dhe nga frika se protesta nuk do të jetë masive.
Synim i opozitës, protestat masive
Njohësi i rrethanave politike në Kosovë, Mazllum Baraliu, ka thënë për tesheshi.com se arsyet mund të jenë të shumta që nuk janë bërë publike deri më tani nga partitë opozitare.
Sipas tij, një prej arsyeve pashmangshëm mund të jetë dorëheqja e Donika Kadaj-Bujupit nga AAK-ja dhe deklarimet e bëra nga sekretari i Vetëvendosje-s Dardan Molliqaj për mungesën e koordinimit dhe gatishmërisë që opozita të del së bashku me një listë të përbashkët zgjedhore në rast të mbajtjes eventuale të zgjedhjeve të parakohshme.
“Arsye të tjera pse opozita e anuloi protestën mund të jenë edhe dallimi në qasje sa i përket pjesëmarrjes në Parlament, ku dihet se AAK dhe NISMA janë të vendosura të mos marrin më pjesë në seanca kurse VV është deklaruar se duhet të jetë në mënyrë selektive e pranishme, pra, varësisht nga rëndësia e çështjeve që trajtohen dhe kjo mund të jetë një nga pikat dalluese, çarëse sa i përket monumentumit politik”, thotë Baraliu për tesheshi.com.
Sipas tij, arsye tjetër e fortë mund të jetë edhe çështja e masovitetit të protestës si mënyra e protestimit si metodë demokrtiake, ku VV mund të jetë e prirur të protestoi në mënyrë sa më aktive dhe jo vetëm paqësisht.
“Opozita dëshiron që protestat të jenë sa më masive dhe ta imponojnë qeverisjen e tanishme të reflektojë, të ofrojë një dialog serioz dhe të sinqertë opozitës për marrëveshje, dialog i cili do të ngërthente në vete edhe zgjedhjet si zgjidhje.
Pra, disa nga këta faktorë që kanë dalë në sipërfaqe dhe nuk është lajm i mire veçanërisht për proceset në Kosovë dhe demokracinë pas kaq muajsh opozita reflekton çarjet dhe dallimet e saj brendapërbrenda korpusit opozitar. Por, nuk është lajm i mirë as këmbëngulësia e pozitës e cila nuk dëshiron në asnjë mënyrë të ofrojë një dialog edhe të sinqertë edhe përmbajtësorë dhe të mënjëhershëm për të mos përkeqësuar gjendjen dhe telluar krizën në mënyrë që të gjindet një zgjidhje konsensuale”, ka thënë Baraliu, për tesheshi.com.
Marrëdhëniet mes opozitës kanë nisur të luhaten
Analisti tjetër, Islam Krasniqi, thotë se kohëve të fundit kanë filluar të luhatën marrëdhëniet mes subjekteve opozitare, dhe një prej çarjeve ëhtë mospajtimi për të braktisur Kuvendin si dhe lista e përbashkët zgjedhore.
“Deklarata e bërë nga kreu i VV-së Visar Ymeri se protesta është shtyrë për arsye se opozita e bashkuar ka nevojë për më shumë konsolidim të brendshme, nuk besoj se qëndron. Besoj se proteta është anuluar deri në pritjen e rezultateve nga komisioni i Demarkacionit i themeluar nga presidentja në ikje Atifete Jahjaga.
Duke u bazuar në protestat e kaluara, nuk besoj që mungon përkrahja sepse natë e ditë kanë dal në teren për të kërkuar nga populli që t’i bashkangjiten protestën. Por, shtyerja mund të ketë ndodhur edhe për shkak të mosmarrëveshjeve që ka brenda partisë AAK-ja”, ka thënë Krasniqi për tesheshi.com.
Ndryshe, lideri i AAK-së, Ramush Haradinaj pas mbledhjes së jashtëzakonshme të Këshillit të Përgjithshëm të partisë të mbajtur të shtunën ka thënë se protesta e radhës e opozitës së bashkuar mund të mbahet pas një jave, por megjithatë nuk ka dhënë një datë të saktë. /tesheshi.com/
