Një projektligj që parashikon burgosjen e fëmijëve nga mosha 12 vjeç të gjetur fajtorë për “sulme terroriste” është aprovuar sot nga parlamentarët izraelitë.
Një njoftim i qeverisë izraelite bëri të ditur sot se nisma e re ligjore u jep mundësi autoriteteve t’i burgosin të vegjlit të shpallur fajtorë për vrasje apo për vrasje në tentativë edhe nëse ai apo ajo është nën moshën 14 vjeç.
Njoftimi i qeverisë thoshte se sulmet e muajve të fundit kërkojnë një qasje më agresive, edhe ndaj të vegjëlve.
Sipas një llogaritjeje të AFP-së, dhuna në territoret palestineze dhe në Izrael që nga tetori i vitit të shkuar u ka marrë jetën 219 palestinezëve e 34 izraelitëve.
Ligji ushtarak që zbatohet aktualisht për banorët palestinezë të Bregut Perëndimor e lejon tashmë dhe burgosjen e 12-vjeçarëve.
Grupi izraelit i të drejtave, B’Tselem, e kritikoi ligjin në fjalë nëpërmjet një deklarate, ku thuhej: “Në vend që t’i dërgojë në burg, Izraeli do të ishte më mirë t’i dërgonte ata në shkollë, ku mund të rriten me dinjitet dhe në liri, jo nën pushtim. Burgosja e të vegjëlve të tillë u heq atyre mundësinë e një të ardhmeje më të mirë.” /tesheshi.com/
