Presidenti maqedon Gjorgje Ivanov, në fjalimin e tij të fundvitit është treguar i vendosur që çështjen e dygjuhësisë, ngritur me forcë sidomos nga Lëvizja BESA ta konsiderojë të mbyllur.
“Dëgjoj se po kërkohet dygjyhësi në gjithë territorin e Maqedonisë. Ajo çështje është mbyllur me amendamentin e 5 të Kushtetutës së Republikës së Maqedonisë, i cili buron nga Marrëveshja e Ohrit, ku është rregulluar çështja e gjuhës zyrtare në Republikën e Maqedonisë”, ka thënë Ivanov, duke kërkuar njëherësh dhe një regjistrim të ri të popullsisë: “Përdorimi zyrtar i cilësdo gjuhë në Republikën e Maqedonisë varet nga statistika, ndërsa e vetmja mënyrë për të pasur statistikë reale, është regjistrimi”.
Ka reaguar menjëherë BESA duke thënë se presidenti Ivanov ka prekur tema që nuk janë kompetencë e tij
“Maqedonia patjetër duhet t’i qaset ridefinimit të sistemit politik, marrëdhënieve ndërkombëtare dhe të gjithë sistemit shtetërir, ku gjuha shqipe do të jetë zyrtare në gjithë territorin e Maqedonisë. Atë që e ka thënë zotëri Ivanov nuk është në kompetencë të kryetarit të shtetit”, kështu ka deklaruar Faton Fazliu, shefi i kabinetit të kreut të BESËS. /tesheshi.com/
