Nga Blendi Gashi
Kryeministri Isa Mustafa ka emëruar Ivan Todosijeviqin për ministër të Administrimit të Pushtetit Lokal, pozitë kjo e mbetur bosh që pas dorëheqjes enigmatike të ministres Mirjana Jevtiq, pak ditë pas emërimit.
Ministri i ri që është propozuar nga Lista Serbe është kuadër i partisë Përparimtare Serbe të Aleksandër Vuçiqit, njëherit kryetar paralel i komunës se Zveçanit, i cili njihet dhe si një nga iniciatorët e ndërtimit të lagjes “Lugina e Diellit”, që çoi jo pak pluhur në vend.
Dy deklaratat e Todosijeviq që tregojnë se ai nuk e njeh shtetin e Kosovës
Se ministri i ri Todosijeviq është dhe një tjetër serb i deleguar nga Vuçiç për të punuar për Serbinë dhe se nuk i njeh institucionet kosovare, pasi e njeh vetëm si “Kosovo Metohi”, e dëshmojnë dhe dy deklarata të dhëna nga ai vitin e kaluar ku flet për ndërtimin e lagjes së ashtuquajtur “Lugina e Diellit”.
Ivan Todosijeviq, më 14 qershor të vitit 2016 si kryetari i organit të përkohshëm të Zveçanit, institucion ky i krijuar nga Beogradi zyrtar, duke folur për “Luginën e Diellit”, deklaroi për radion “Evropa e Lirë” se i mbetet Prishtinës që të tregojë vullnetin e mirë për të dhënë lejen e ndërtimit për shtëpitë, gurthemeli i të cilave është vënë.
“Gurthemeli është vënë dhe së shpejti do të fillohet ndërtimin. Nëse do të kishte vullnet të mirë Prishtina në mënyrë të papengueshme do të lëshonte lejet e tilla nga pala kosovare. Është vetëm çështja e vullnetit të mirë të Prishtinës, por jemi dëshmitarë të këtyre 17 viteve të fundit, Prishtina në asnjë moment nuk ka treguar vullnetin e mirë për të ndihmuar kthimin e popullatës serbe në Kosovë dhe Metohi”, tha Todosijeviq, duke akuzuar autoritetet qendrore në Prishtinë, për siç tha, tentim për të penguar procesin e nisur.
Kurse më 17 korrik të vitit 2016, si kryetar i të ashtuquajturit “organ i përkohshëm” në Zveçan, për Radion Evropa e Lirë tha se falë Serbisë po realizohen projekte si “Lugina e Diellit”, sanatoriumi “Rajska banja”, dhe ujësjellësi rajonal.
“Gjithçka që kemi planifikuar dhe bërë, nuk do të ishin të mundura pa shtetin tonë Serbinë, pa Qeverinë e Republikës së Serbisë, pa Zyrën për Kosovën dhe pa Dioqezën e Rashkës dhe Prizrenit, të cilët i kanë identifikuar këto projekte dhe i kanë vënë në radhë si projekte me rëndësi të madhe nacionale. Po ndërtohet edhe ‘Lugina e diellit’, një vendbanim modern për të kthyerit, që do të lidhet me infrastrukturë të plotë dhe me përmbajtjet përcjellëse”, u shpreh para më pak se një viti Todosijeviq, duke thënë se “në këtë vendbanim do të akomodohen rreth 300 familje të kthyera dhe Komuna e Zveçanit do t’i ketë rreth ose 1 mijë e 500 banorë të rinj”.
“Secila familje e kthyer, do ta fitojë edhe një vend pune. Ndërtimi i “Luginës së diellit” do të përfundojë në vitin 2017”, deklaroi Todosijeviq, i cili shtoi se ndërkohë është duke u bërë studimi i realizimit të projektit për fabrikën e baterive, që do të vendoset në hapësirën e “Trepçës”, të cilën do ta financojë qeveria e Serbisë.
Ndryshe, mediat serbe raportojnë se në zgjedhjet lokale në Kosovë, Todosijeviq ka qenë kandidat për kryetar të Zveçanit por shumë shpejt e tërhoqi kandidaturën.
Në të kaluarën, Todosijeviq ka qenë edhe drejtor në Ndërmarrjen Publike Komunale në Zveçan.
Ndërkaq, Mirjana Jevtiq, me propozim të “Srpska”-s është emëruar në postin e zv. ministres së Punës dhe Mirëqenies Sociale, pozitë të cilën e ka ushtruar edhe para se të emërohet ministre e MAPL-së. /tesheshi.com/
