Kryetarja e grupit parlamentar demokrat në radhët e “opozitës së re” në parlament, Rudina Hajdari, pretendoi se është kërcënuar në ambientet e brendshme të Kuvendit, duke lënë të nënkuptuar se kjo ka ndodhur nga njerëz me mandat deputeti. Duke iu drejtuar kryeparlamentarit Ruçi, znj.Hajdari tha:
Para pak ditësh u dërgova një shkresë për një kërkesë që të siguroni ambientet e Kuvendit dhe të Kryesisë. Nuk mund të ndodhë sot, që në 2019 deputetët të kërcënohen. E papranueshme që një femër të kërcënohet. Kam pasur raste që në zyrën time kur persona më kanë ardhur në zyrë dhe më kanë kërcënuar.
Nuk mundet të ndodhë më, ka ikur ajo kohë. Ju lutem, merrni masat para se të kemi ndonjë viktimë këtu në parlament.
Sikur janë masat para Kuvendit, masat të jenë në Kryesinë e Kuvendit, ku asnjë deputet nuk duhet të hyjë pa u kontrolluar, e nuk duhet të marrë përforcime me njerëz të tjerë dhe të shantazhojë”, tha ajo nga folësja e parlamentit.
Ruçi reagoi duke thënë se i është përgjigjur kërkesës së saj.
Zonja Hajdari, e kam marrë shkresën tuaj dhe e kam adresuar. U kam kërkuar punonjësve të shërbimit që brenda godinës së kryesisë së Parlamentit punonjësit të bëjnë detyrën dhe në mënyrë të posaçme ia kam përcjellë kërkesën Ministrisë së Brendshme, që të merren masat”, qe përgjigja e kryeparlamentarit Ruçi.
Kujtojmë se 21 vite më parë, i ati i deputetes Hajdari, Azem Hajdari, u vra pranë selisë së PD-së në një atentat edhe me sfond politik, ku nuk kanë munguar teoritë konspirative si një “vrasje nga brenda”, nënkupto PD-së. Tashmë, edhe zonja Hajdari është në përplasje të brendshme, ku nga njëra anë është pozicionuar kundër kryetarit Basha, si me mosdorëzimin e si me kritikat ndaj stilit të tij opozitar. E ndërkohë, kolegu i saj në grup Korab Lita, i është bërë rival për drejtimin e grupit parlamentar. /tesheshi.com/
