Islanda arriti barazimin e dytë në debutimin e saj në Europian, por për pak gjë mund t’i ishte gëzuar fitores së parë. Ndaj Hungarisë, islandezët u ndëshkuan tre minuta para mbarimit të ndeshjes.
Islandë – Hungari sapo ka përfunduar në barazim 1-1. Një ndeshje e vlefshme për grupin F, që e ngjit Hungarinë në kuotën e 4 pikëve, duke kryesuar për momentin, kurse Islanda ka 2 pikë pas dy ndeshjesh.
Islandezët do të kalonin në epërsi në minutën e 40-të, kur gjyqtari dha një 11-metërsh në favor të tyre mbasi lojtari më në moshë i turneut, portieri i Hungarisë, Kiraly, kreu një ndërhyrje të gabuar. Sigurdson tregohet i saktë nga pika e bardhë, duke shënuar për Islandën.
Hungarezët do të kërkonin pareshtur të shënonin në pjesën e dytë. Gjatë gjithë kohës përpara, goli për ta do të vinte tre minuta para mbarimit të lojës. Në fakt, do të ishte një autogol, i ardhur pas presionit të ushtruar. Një top para porte, dhe Saevarsson detyrohet ta shtyjë atë në rrjetën e tij. 1-1!
Janë islandezët që shohin më pas nga porta kundërshtare, por më kot. Edhe një mundësi e mirë në çastet e fundit, në një goditje dënimi, nuk shfrytëzohet.
Eshtë aktivizuar në minutat e fundit për islandezët dhe Gudjohnsen, ish-sulmuesi i Çelsit, Barcelonës dhe Monakos e Totenhemit, i pritur me duartrokitje të zjarrta nga tifozët në shkallët e stadiumit.
Në orën 21:00 luhet Portugali – Austri, që mbyll serinë e ndeshjeve të dyta në grupe. /tesheshi.com/
