Ky përfundim ka dalë në konferencën e 33-të të Këshillit Francez të Besimit Musliman, të mbajtur në Le Bourget të Francës.
Në fjalën e tij, drejtuesi i këtij organizmi, Anouar Kbibeche, ka deklaruar se islamofobia është shtuar në Francë pas sulmeve vitin e shkuar.
“Sulmet mbi faltoret muslimane janë shtuar me gjithë rritjen e masave të sigurisë. Së fundi është dëmtuar një xhami e vogël në Ajaccio. Veç kësaj, ka patur një numër sulmesh mbi individë muslimanë.”
Ndërsa zëvendëskryetari i këtij këshilli, Ahmet Ogras, siç raporton Anadolu Ajansı, i ka nxitur muslimanët që ta bëjnë zërin e tyre të dëgjohet.
“Ne jemi elementë të kësaj shoqërie në Francë si muslimanë. Ne duhet të jemi në gjendje të shprehim mendimet tona dhe t’u bashkohemi partive politike. Ne duhet ta rrisim fuqinë e përfaqësimit të muslimanëve duke shprehur vetveten.”
Një tjetër folës në konferencë, kryetari i Unionit të Organizatave Islame të Francës, Amar Lasfar, do të shprehej kështu gjatë punimeve ditën e djeshme: “Ne ia shtrijmë dorën e ndihmës çdokujt në emër të solidarësisë dhe të ardhmes së begatë, çfarëdo që të jetë feja, kultura dhe vlerat e tij.”
Aktet islamofobe janë shtuar veçanërisht pas sulmeve të nëntorit të shkuar në Paris. Një tjetër drejtues organizate, Abdallah Zekri, do të bënte të ditur në fillim të këtij viti se ndërsa në vitin 2014 ishin regjistruar 704 akte antimuslimane, ky numër kishte arritur në 905 në 2015-ën. /tesheshi.com/
