Një grup i ish-ushtarëve të pakënaqur të UÇK-së, përmes një proteste simbolike, të mbajtur në sheshin “Skënderbeu” në Prishtinë kanë kërkuar pastrimin e listave te veteranëve, njohjen e statutit të invalidit të gjithë atyre qe si pasojë e luftës vuajnë nga sëmundjet e ndryshme dhe shkarkimin e komisionit invalidor i tanishëm.
Jeton Selmani, veteran nga Zona e Llapit ka thënë se ata janë tejet të pakënaqur me gjendjen në të cilën ata janë lënë, ndërsa ka fajësuar edhe përfaqësuesit e Shoqatave të Veteranëve duke thënë se edhe ata janë manipulues të mëdhenj.
“Lusim përfaqësuesit qeveritarë që të ngritin zërin kundër degradimit të vlerave të luftës dhe i bëjmë thirrje prokurorisë që të na thirrin dhe të dëshmojmë. Kemi shoqata, po nuk kemi shoqata, sepse ata përfaqësojnë 45 mijë veteranë të rrejshëm dhe ata janë manipulues të rrejshëm. Për këtë proces të gjithë jemi fajtorë dhe sot kemi thirrur këtë protestë simbolike dhe nuk do t’i ndalim protestat”, tha Selmani.
Ndërsa Bajram Jahja nga Mitrovica ka fajësuar komandatin e Forcës së Sigurisë së Kosovës për fyerjen e listave.
“Ne që kemi luftuar ne jemi ‘sokaqeve’ e kemi nga një punë po s’jemi askund. Në institucione i futen këta të korruptuarit dhe ata po na shkelin neve. I bëjmë ftesë NATO-së, KFOR-it dhe Amerikës që ta na çlirojnë nga kjo situatë. Pagat i kanë rrit për vete, ndërsa ne me 200-300 euro si mund të jemi të kënaqur? Me Rrahman Ramën kemi qenë në një vend, kemi luftuar bashkë. Ndërsa tash ai ka fryrë listat së bashku me të tjerët duke i futur në listat e veteranëve edhe familjarët”, ka thënë Jahja.
Protestuesit kanë kërkuar takim me Ramush Haradinaj, i cili ka dalë para tyre dhe ju ka premtuar se do t’i takoi gjatë ditës, për çka janë pajtuar veteranët. /tesheshi.com/
