Roger Federer, tenisti zvicerian që ka fituar 17 tituj të Grand Slam-eve, ka lajmëruar se për shkaqe fizike nuk do të marrë pjesë në Lojërat Olimpike të gushtit, e po ashtu do të mungojë dhe në pjesën tjetër të sezonit.
“Të dashur tifozë,” shkroi ai në faqen e tij në Facebook, “jam tejet i zhgënjyer që të njoftoj se nuk do të jem në gjendje ta përfaqësoj Zvicrën në Lojërat Olimpike në Rio, e se do të mungoj po ashtu në pjesën e mbetur të sezonit.”
34-vjeçari bëri të ditur se e mori vendimin me këshillën e mjekëve, pasi synon ta zgjasë karrierën sa të jetë e mundur.
Federer do të kryente një operacion në gju në shkurt të këtij viti, për të munguar më pas në turneun French Open për shkak të probleme në shpinë. Ai do të arrinte gjer në gjysmëfinale në Wimbledon, por gjatë lojës kërkoi dy herë trajtim mjekësor.
Tenisti zvicerian humbi katër vite më parë në finalen ndaj Andy Murray-it në Lojërat Olimpike. Fitimi i medaljes së artë do të vazhdojë të mbetet ëndërr për të, edhe pse një të tillë e ka marrë në Pekin, në 2008-tën, por së bashku me Wawrinka-n, në tenisin dyshe. /tesheshi.com/
