Ish-shefi i shërbimit sekret serb, Zoran Mijatoviq, e ka quajtur “idiotësi” vendimin e një komisioni hetimor serb për t’i përdorur ditarët e luftës së UÇK-së si provë për t’i dënuar ish-komandantët kosovarë në Gjykatën Speciale.
Në një editorial të botuar në të përditshmen serbe Danas, kryespiuni që punoi me kryeministrin e vrarë serb, Zoran Xhinxhiq, thekson se “ditarët e luftës janë dokumente thjesht operative, dhe nuk mund të jenë kurrë dëshmi për krime”.
Mijatoviq thotë në shkrimin e gjatë, që e përditshmja Danas e ka vendosur në ballinë, se një dëshmi penale kërkon prova shkencore, shkresore, por, mbi të gjitha, dëshmi njerëzore. “KFOR-i i ka dhënë sepse nuk përbëjnë rëndësi tashmë; ato thjesht mund të shkruajnë historinë e UÇK-së, që në fakt nuk është detyra e institucioneve tona”, është shprehur oficeri i lartë i Ministrisë së Brendshme të Serbisë, i cili i përgjigjet që në fillim kryetarit të komisionit parlamentar për krimet e luftës së Kosovës.
“Më vjen shumë keq që të zhgënjej Milovan Dreçunin, por në kohën e kryeministrit Zoran Xhinxhiq, i përshkruar herë-herë si antiserb, është punuar në mbledhjen e dëshmive të krimeve ndaj serbëve të Kosovës. Unë në emër të shërbimit kam marrë pjesë në këtë veprim”, deklaron Mijatoviq.
Ish-shefi i shërbimit sekret serb i ironizon deklaratat e pjesëtarëve të Partisë Progresiste në pushtet, duke thënë se, “kjo qeveri thotë shpesh të famshmen frazë ‘për herë të parë në histori’, duke kujtuar se çdo gjë është shpikur sot”.
Një komision i parlamentit serb do t’ia dërgojë Gjykatës Speciale në Hagë të gjitha ditarët e luftës të mbajtura nga formacionet e Ushtrisë Çlirimtare të Kosovës, si provë për t’i dënuar komandantët e UÇK-së. Këto ditare janë dorëzuar nga KFOR-i në bazë të një marrëveshje me qeverinë e Serbisë. Ky fakt përbën një skandal, pasi ditarët e luftës janë pjesë e trashëgimisë historike të përpjekjes së armatosur të shqiptarëve për t’u çliruar nga pushtimi serb. Askush nuk mund ti konfiskojë ato.
Nuk dihet pse kanë heshtur dhe heshtin komandantët e UÇK-së. Në të vërtetë, një shpjegim është: pas luftës ata të gjithë u bënë politikanë dhe kërkonin pushtet…
Përgatiti Ylli Pata- /tesheshi.com/
