Mërgimtarët, ose ndryshe gurbetçarët, siç u thuhet në gjuhën urbane, të cilët po kalojnë pushimet këto ditë në Kosovë, në vazhdimësi japin vërejtjet e tyre lidhur me trajtimin që iu bëhet atyre në vendlindje. Mungesën e kësaj përkrahje e konfirmoi edhe kryetari i Akademisë së Shkencave dhe Arteve të Kosovës, akademik Nexhat Daci, i cili thotë se mërgata duhet të kërkojë më shumë nga institucionet e Kosovës.
Gjatë një pritje që i bëri një delegacioni të Shoqatës së Shkrimtarëve dhe Artistëve Shqiptarë “Papa Klemneti XI Albani” që vepron në Suedi, Daci tha se shqiptarët në mërgatë duhet të bëjnë më shumë presion për të kërkuar trajtimin që meriton.
“Asnjëherë mërgata nuk e ka marrë trajtimin e merituar nga institucionet e Kosovës. Kjo duhet të jetë shenjë që ju duhet të bëni edhe më shumë presion, presion gjithmonë në kuptimin pozitiv them, me ardhjen e mërgatës në vendlindje. Me ndërrimin e gjeneratave ndërrohemi ne dhe ju dhe më e keqja është se në mërgim gjithnjë e më shumë fëmijët flasin gjuhën e vendit ku jetojnë. Ky nuk është faji i fëmijëve dhe i nënave, por shoqatat si ju duhet të bëni çmos që të ruhen rrënjët e kombit”, tha akademik Daci.
Daci përmendi me këtë rast, shembullin e Kroacisë dhe mërgatën e saj, se si ka ndikuar në ndërtimin dhe formimin e shtetit kroat.
Ai më tej tha se mërgata e ka ndihmuar shumë Kosovën dhe popullin e saj të qëndrojë në kohë të vështira.
“Të ardhurat e Kosovës nga mërgata kanë qenë një shpëtim mos me u var nga armiku për bukë. Mërgata ka dhënë një kontribut shumë të madh që të qëndronin stoikë shqiptarët ku janë, për me ruajt vetveten, fëmijë. Dhe janë një rast unik. Për këtë arsye, po ndodh ky takim, sepse unë nuk mbaj takime jashtë shkencës, por kur është çështja e popullatës sonë, nuk i shikoj shumë rregullat”, tha Daci.
Ndërkaq kryetari i kësaj shoqate, Hysen Ibrahimi e njoftoi Dacin me punën që bëjnë në shoqatë, për krijimet e këtij viti dhe për punën që është bërë deri tani. /tesheshi.com/
