Ish-kryeministri i Kosovës njëherësh edhe kryetar i LDK-së, Isa Mustafa është dërguar sot në Shtutgart të Gjermanisë ku do të shtrihet në njërin prej spitaleve në këtë qytet për tu kuruar pas paraqitjes së një problemi shëndetësor, por që nuk dihet saktësisht se nga çfarë vuan.
Aeroambulanca e ardhur në mëngjes nga Austria, sipas mediave kosovare e mori Mustafën në aeroportin e Prishtinës, ku në orën 12 e 30 minuta e njëjta ateroi në aeroportin e Shtutgartit.
Nuk dihet se sa kohë do të qëndroi Mustafa në Gjermani, por këshilltarët e tij kanë thënë se gjendja e tij shëndetësore është staile.
Ndërkohë presidenti Thaçi ka treguar se ka zhvilluar një bisedë telefonike me Mustafën dhe se i ka ofruar përkrahje të plotë për shërim, duke shtuar se i uron shëndet dhe sa më parë t’i kthehet familjes dhe obligimeve institucionale.
“Që nga momenti i informimit për gjendjen shëndetësore të ish kryeministrit Isa Mustafa vura kontakt me bashkëpunëtorët dhe familjarët e tij. Shpreha gatishmërinë për ta vizituar, por procedurat e trajtimit të tij nuk ma mundësuan një gjë të tillë. Përmes telefonit zhvillova një bisedë me të, duke i ofruar përkrahje të plotë për shërim, kudo të jetë e nevojshme. Z. Mustafa i uroj shëndet dhe sa më parë t’i kthehet familjes së tij si dhe obligimeve institucionale”, shkruan Thaçi.
Mbështetje i ka ofruar edhe qeveria e Kosovës e cila thotë se po i përcjellë nga afër zhvillimet rreth gjendjes shëndetësore të tij.
“Qeveria e Republikës së Kosovës dhe kryeministri Haradinaj janë me familjen Mustafa për t’i ofruar mbështetjen dhe përkrahjen për shërimin e shpejt të ish-kryeministrit Isa Mustafa. Qeveria e Republikës së Kosovës do të ofrojë gjithë ndihmën institucionale për shërimin e z. Mustafa”, thuhet në njoftimin e qeverisë.
Lajmet e para për rëndimin e gjendjes shëndetësore të kryetarit të LDK-së kishin dalë më 10 janar ku zyrtarë të kësaj partie kanë thënë se Mustafa është prekur nga një grip sezonal.
Kujtojmë se në Gjermani, Mustafa kishte kërkuar ndihmë mjekësore edhe më parë, për problemet e tij në zemër. /tesh/
