Kreu i LDK-së Isa Mustafa reagoi ashpër ndaj ish-bashkëpartiakes së tij Vjosa Osmani, e cila së fundi paralajmëroi KQZ-në me shkrirje nëse kjo e fundit – e pathënë por e nënkuptuar – nuk do çertifikonte Albin Kurtin, në aleancë me të cilin është për zgjedhjet e 14 shkurtit.
Një listë nga Gjykata Kushtetuese, i dikton KQZ-së që mos çertifikojë 47 emra kandidësh për deputetë, mes tyre dhe Albin Kurti, pasi kanë cenin e të qënit të dënuar me vendim gjykate në tre vitet e fundit.
Për Isa Mustafën, “adresimi i znj Vjosa Osmani për KQZ-në, flet se ajo është një ushtruese krejtësisht e papërgjegjshme e rolit që ushtron”.
“Nga ud Presidentja është pritur të mbrojë Aktgjykimin e Gjykatës Kushtetuese, të mbrojë implementimin e ligjit dhe të mbrojë institucionet e pavarura.
Ajo në petkun e ud Presidentes po abuzon përmes sjelljeve rebele dhe për interesa të saje të reja partiake në VV.
Eshte e palejueshme dhe e turpshme që ud Presidentja t’iu kërcënohet institucioneve të pavarura.
Kjo çfarë paralajmëron ud Presidentja e Kosovës sot dhe sjellja e Vetëvendosjes është alarm për demokracinë dhe shtetin e Kosovës.
Me kete sjellje, ajo nuk meriton as një orë të jete në Presidencë”, shkruan Isa Mustafa, i cili e ka patur Vjosa Osmanin si kundërshtaren më të ashpër të tij në parti.
Kujtojmë se në marrëveshjen me Albin Kurtin, nëse ky i fundit do jetë kryeministër i Kosovës pas 14 shkurtit, Vjosa Osmani do jetë presidente, jo më “në detyrë”, siç aktualisht. /tesheshi.com/
