Kryeministri Isa Mustafa, ka thënë se është i gatshëm të dialogojë me opozitën në Kuvend. Ai ka deklaruar se Lëvizja Vetëvendosje, AAK-ja dhe Nisma janë duke bërë një opozitarizëm të pakuptimtë, që nuk përkon me demokracinë.
“Është jodemokratike t’ia mohosh kryeministrit të drejtën e fjalës në parlament, t’ua pamundësosh deputetëve t’i ushtrojnë detyrat e deputetit. Aksionet e dhunshme dhe të rrezikshme për jetën e deputetëve janë jokushtetuese dhe joligjore. Ato rrënojnë vlerat e demokracisë dhe krijojnë kushte potenciale për konflikte të brendshme”, ka thënë Mustafa në një intervistë për “Epoka e re”.
Ai u ka bërë thirrje Ramush Haradinajt dhe Fatmir Limajt mos të bëhen pjesë e shkatërrimit të institucioneve. “Këtë nuk duhet ta lejojnë as Ramushi e as Fatmiri, se kanë luftuar dhe sakrifikuar për këtë vend”, është shprehur Mustafa.
Pavarësisht kundërshtimeve të opozitës, ai thotë se nuk e ka ndërmend të japë dorëheqje. “Dorëheqja është sinonim i dështimeve”, ka thënë Mustafa.
I pyetur nëse këto veprime të opozitës po ndodhin tash si hakmarrje për largimin e tij nga marrëveshja e koalicionit të ashtuquajtur VLAN, Mustafa ka thënë se hakmarrja mund të përdoret në kohën e zgjedhjeve. “Sa i përket hakmarrjes, ata mund të më hakmerren me vota në zgjedhje, sepse institucionet më të larta shtetërore nuk janë arena të hakmarrjeve, por të dialogut dhe të rivalitetit politik”, është shprehur Mustafa.
Ndërkaq duke folur për liberalizmin e vizave, kryeministri Mustafa ka thënë se Kosova i ka plotësuar pothuajse të gjitha kriteret. “Shpresoj shumë, se më së largu në dhjetor të këtij viti do të caktohet data se kur do të aplikohet liberalizimi në vitin 2016”, është shprehur ai.
Mustafa ka shtuar se Qeveria të cilën e drejton është duke punuar me përkushtim edhe për luftimin e korrupsionit dhe krimit të organizuar. Ai po ashtu ka paralajmëruar se do të ketë edhe një vlerësim të të gjitha ministrive./tesheshi.com/
