Kur kanë mbetur edhe më pak se dy javë në mbajtjen e mbledhjes së dy qeverive, asaj të Kosovës dhe Shqipërisë në Prishtinë, kryeministri Isa Mustafa u ka bërë thirrje ministrave të kabinetit të tij që të intensifikojnë përgatitjet rreth marrëveshjeve që mund të nënshkruhen në atë seancë.
“Në zyrën tonë kanë arritur vetëm tri marrëveshje, zyrtarisht nuk na kanë ardhur marrëveshje tjera. Të mërkurën shkon një ekip në Shqipëri dhe duhet t’i kemi të gjitha propozimet e marrëveshjeve. Iu kisha lut të mos i prolongojmë këto. Kisha kërkuar deri të hënën të kemi informatë, cilat janë ministritë që kanë për të nënshkruar marrëveshje dhe memorandume. Të intensifikohen punimet tek biblioteka në përgatitjen e bibliotekës sepse deri tani nuk është punuar aty. I kam thënë edhe ministrit Yagcilar se mjetet që i ka ministria për këto shpenzime nuk mjaftojnë, të kërkohet nga qeveria të ndajë mjete shtesë. Nuk janë mjete të mëdha sepse s’kemi me ndërruar asgjë vetëm disa rregullime të brendshme”, tha Mustafa.
Ndërsa, ministrja e dialogut, Edita Tahiri kërkoi që në këtë mbledhje të ketë një pikë për mbështetje të qytetarëve të Luginës së Preshevës.
“Për dallim prej shqiptarëve në rajon, gjendja e qytetarëve atje kërkon mbështetje për të mos i lënë jetim. Mendoj se është koha e fundit që të bëjmë shumë për ata edhe nga Shqipëria, edhe nga Kosova. Madje edhe vizitat i kemi të rralla të mos flasim për mbështetje tjera”, tha ajo.
Mbledhja e dy qeverive do të mbahet saktësisht me datë 3 qershor në Prishtinë, në ambientet e Bibliotekës Kombëtarë dhe do të jetë e treta me radhë pas dy takimeve të mëparshme në Prizren dhe në Tiranë. /tesheshi.com/
