Në kohën kur presidenti Thaçi dhe kryeministri Mustafa nuk po lënë gur pa lëvizur për ta miratuar marrëveshjen për Demarkacionin, qeveria ka marrë një goditje të madhe pasi komisioni për matjen e territorit ka mbetur pa një anëtar.
Bëhet fjalë për gjeografin Fitim Humolli, i cili ka dhënë dorëheqje nga komisioni pasi e cilëson si joprofesional dhe të themeluar për konsum politik.
Në dorëheqjen prej katër faqesh që ja ka dërguar qeverisë të cilën e ka siguruar KTV-ja, Humolli sqaron arsyet e dorëheqjes së tij, ku një prej tyre është se “kadastra nuk duhet të jetë kriter për definimin e kufirit shtetëror, aq më tepër që përmes këtij kriteri Kosova humb territor të konsideruar”.
Gjatë katër mbledhjeve të komisionit në fjalë, Humolli, si përfaqësues i Departamentit të Gjeografisë në Universitetin e Prishtinës, me ftesën e qeverisë ka qenë zëri më oponent që ka kundërshtuar përpjekjet për të përcaktuar kufirin përmes të dhënave kadastrale. /tesheshi.com/
