Nga Mensur Krasniqi
Komuniteti turk në Maqedoni nëpërmjet organizatës joqeveritare “Ufuk” ka paralajmëruar protesta kundër kryeredaktorit të Tv Sitel, Dragan Pavloviç Llatas, ku në emisionin e tij të mbrëmshëm, pas 10 vitesh si mysafir kishte liderin e LSDM-së, Zoran Zaev, të cilit në një moment i tha: “po gënjen sikur turk”.
“Fjalët që i dëgjuam përpara ekraneve ishin tronditëse, të papranueshme dhe shumë fyese. Pyesim publikisht prej ku Llatas e merr këtë përgjegjësi dhe trimëri. Kërkojmë që në kohë sa më të shpejtë të kërkojë falje publike në “Sitel” dhe u bëjmë thirrje të gjithë turqve mendjelirë të Maqedonisë ta bojkotojnë këtë televizion. Në këtë rast apelojmë deri te turqit e Maqedonisë të mos bien në nivelin e këtij mediumi kriminel”, thuhet në njoftimin e “Ufuk”.
Sipas tyre protesta ka për qëllim të kërkojë që qeveria të distancohet nga komenti i Llatasit (pasi që ata janë financuesit më të mëdhenj të televizionit Sitel), të gjitha partitë turke të dalin nga koalicioni me VMRO-DPMNE-në, si dhe deputetët e parlamentit të Republikës së Maqedonisë të kërkojë përgjegjësi nga televizioni Sitel.
Këta paralajmërojnë se në fund të protestës do të merren vesh që të ngrenë padi grupore ndaj kryeredaktorit Llatas.
“Turqit nuk gënjejnë”, shkruhet në thirrjen publike e cila është përhapur në rrjetin social Facebook.
Nga ana tjetër, në edicionin e lajmeve në ora 23:00, Llatas e ka kuptuar gabimin që kishte bërë dhe ka kërkuar falje publike duke premtuar se më nuk do të përsëritet.
Nga ana tjetër, pjesëmarrja e Zoran Zaevit në televizionin privat pro-qeveritar “Sitel” te kryeredaktori Dragan Pavloviq- Llatas ka rezultuar me sulme dhe kërcënime direkte ndaj kreut të LSDM-së dhe në tentim që të provokohet largimi nga studio.
Kishte shumë pak të dhëna të reja në interes të qytetarëve, ndërsa më shumë përleshje me nivel të ulët profesional dhe gazetaresk.
Lajmi i vetëm i ri e që e njoftoi Zaev ishte se Prokurorisë Speciale i ka dorëzuar gjithsej 1 milion e 50 mijë biseda të përgjuara. /tesheshi.com/
