Komandanti i Gardës Revolucionare Iraniane, Husein Salami, kërcënoi me hakmarrjen ndaj të gjithë atyre që ishin përfshirë në vrasjen e gjeneralit iranian Qassem Soleimani.
Ndërsa u botua në faqen e internetit të Gardës Revolucionare, Salami, në një mesazh drejtuar PresidentitTrump, njoftoi se hakmarrja e Iranit për “martirizimin” e gjeneralit do të ishte “e qartë, serioze dhe e vërtetë”, raporton AP.
Soleimani, që besohet të ishte njeriu i dytë më me ndikim në Iran, u vra në një sulm me dron amerikan në Bagdad, Irak. Ai shoqërohej nga një komandant i lartë irakian dhe disa anëtarë të IRGC-së, edhe këta të vrarë.
Pas sulmit, lideri suprem i Iranit, Ali Ali Khamenei premtoi “hakmarrje të ashpër” për autorët e krimit.
Trump kërcënoi këtë javë se SHBA do t’i përgjigjeshin ashpër çdo përpjekjeje të Iranit për të marrë hak për vdekjen e Soleimani, duke theksuar se Uashingtoni do të hakmerret “një mijë herë më fort”.
Më herët, kishte një raport sipas të cilit Irani planifikoi vrasjen e ambasadorit amerikan në Afrikën e Jugut, Lana Marx, por Salami e hodhi poshtë atë pretendim.
“A mendoni se ne do të hakmerremi për martirizimin e vëllait tonë duke goditur ambasadorin që është një grua? Ne do të godasim ata që kishin një rol të drejtpërdrejtë dhe të tërthortë. Ju duhet ta dini që të gjithë që kanë patur një rol në atë vrasje do të goditen. Dhe ky është një mesazh serioz”, tha Salami në një mesazh për Trump. /tesheshi.com/
