Irani hodhi poshtë si jo konstruktiv një deklaratë të Francës, Britanisë dhe Gjermanisë, e cila thotë se kërkesat e Teheranit kërcënojnë negociatat për ringjalljen e marrëveshjes bërthamore me fuqitë botërore nga viti 2015, raportojnë mediat shtetërore iraniane.
Zëdhënësi i Ministrisë së Jashtme të Iranit, Nasser Kanani tha se njoftimi ishte jokonstruktiv, duke shtuar se tre vendet evropiane u këshilluan të luanin një rol më aktiv në gjetjen e zgjidhjeve për t’i dhënë fund disa dallimeve të mbetura.
Në një deklaratë, tre fuqitë evropiane shprehën pakënaqësinë ndaj kërkesës së Iranit në bisedimet bërthamore që Agjencia Ndërkombëtare e Energjisë Atomike të mbyllë hetimin e saj për gjurmët e uraniumit të gjetura në tre vendndodhje.
Kërkesa shtesë të SHBA
Irani gjithashtu njoftoi disa ditë më parë se Shtetet e Bashkuara duhet të ndalojnë kërkesat shtesë në bisedimet në lidhje me ringjalljen e marrëveshjes bërthamore të vitit 2015.
“Bisedimet për marrëveshjen po vazhdojnë dhe pala tjetër duhet të ndalojë së bërë kërkesat shtesë, sepse deri tani është marrë një qasje konstruktive në negociatat,” tha Ali Bahadri Jahormi, zëdhënës i qeverisë iraniane. /tesheshi.com/
