Pas më shumë se katër vitesh, makinat e para pritet të importohen në Iran pas disa muajsh, me shpresën se kjo lëvizje mund të ndihmojë tregun kaotik.
Javën e kaluar, kabineti i presidentit Ebrahim Raisi miratoi përfundimisht ligjin që rregullon importin e automjeteve të prodhuara jashtë vendit.
Paraardhësi i tij, presidenti Hassan Rouhani, zyrtarisht ndaloi importin e produkteve të gatshme në korrik 2018, duke lejuar vetëm importin e pjesëve të makinave.
Vendimi ishte në përgjigje të tërheqjes së SHBA nga marrëveshja bërthamore me fuqitë e mëdha në 2015, e cila u pasua nga sanksionet ekonomike të SHBA.
Ndërsa partnerët perëndimorë u tërhoqën nga tregu iranian, u hap dera për makina të ndryshme kineze, të cilat që atëherë kanë vërshuar tregun.
Një pjesë e vogël e tregut mbetet nën kontrollin e prodhuesve vendas të makinave, kryesorja e të cilëve është kompania shtetërore Khodro, makinat e së cilës përfundimisht u bënë të papërballueshme për qytetarët për shkak të krizës valutore dhe inflacionit.
Policia dhe disa ekspertë kanë fajësuar edhe disa prodhues vendas për përqindjet shumë të larta të aksidenteve me fatalitet automobilistik.
Vlera maksimale 20000 euro
Edhe qytetarët nuk mund të blejnë shumë makina kineze, për shkak të tarifave të larta të importit, të cilat gjoja synojnë të mbrojnë prodhimin vendas.
Disa njerëz në Iran shpresojnë se ligji i ri do të hapë derën për importin e makinave më cilësore.
Megjithatë, me sanksionet e SHBA-së, kjo nuk është e realizueshme.
Ligji thotë se një miliard euro do të ndahen për import përmes Bankës Qendrore të Iranit dhe se të gjitha makinat e importuara nuk duhet të kalojnë vlerën e 20 mijë eurove, pra përparësi kanë makinat me vlerë më të vogël se 10 mijë euro, në mënyrë që automjetet të jenë në dispozicion të qytetarit mesatar.
Kjo automatikisht përjashton shumë modele të njohura nga prodhuesit globalë.
Makinat hibride ose elektrike mund të importohen në zona të veçanta tregtare ose industriale dhe importuesit duhet të investojnë vetë në stacionet e karikimit, tha qeveria.
Zyrtarët qeveritarë thanë se bisedimet ishin zhvilluar me kompani perëndimore, kineze dhe indiane, pa dhënë detaje të mëtejshme. /tesheshi.com/
