Të paktën katër persona janë vrarë, sipas informacioneve jozyrtare, në protestat në të gjithë Iranin për shkurtimin e subvencioneve shtetërore për ushqimin, të cilat janë shndërruar në politike, me protestuesit që kërkojnë ndryshimin e qeverisë.
Sipas Reuters, duke iu referuar rrjeteve sociale, protestuesit po thërrasin slogane duke i kërkuar liderit të largohet.
Protestat nisën në disa qytete javën e kaluar dhe u shkaktuan nga vendimi i qeverisë për uljen e subvencioneve, që shkaktoi një rritje prej 300 për qind të çmimeve në Iran për ushqime të ndryshme bazë me bazë mielli.
Qeveria ka rritur gjithashtu çmimet e vajit ushqimor dhe produkteve të qumështit në një vend ku pothuajse gjysma e 85 milionë njerëzve jetojnë nën kufirin e varfërisë, tregojnë shifrat zyrtare.
Protestuesit tani kanë zgjeruar listën e tyre të kërkesave, duke kërkuar liri më të mëdha politike, fundin e Republikës Islamike dhe rënien e liderëve të saj, sipas dëshmitarëve okularë dhe komentuesve në rrjetet sociale, shtoi agjencia britanike.
Protestat u mbajtën në provincat e Ardabilit, Kuzestanit, Lorestanit dhe Razavi Khorasanit.
Të dielën, tubime proteste u mbajtën në të paktën 40 qytete në të gjithë Iranin, duke përfshirë Kuchaner, në kufirin me Turkmenistanin.
Reuters nuk mundi të verifikonte në mënyrë të pavarur vërtetësinë e komenteve dhe pamjeve në mediat sociale.
Agjencia shtetërore e lajmeve IRNA tha të premten se disa dyqane u dogjën në disa qytete, kjo është arsyeja pse policia arrestoi “provokatorët”.
Agjencia gjysmë zyrtare e lajmeve ILNA raportoi të premten se një protestues ishte vrarë në qytetin Deufzl, por videot në Twitter tregojnë se të paktën katër protestues u vranë nga forcat e sigurisë.
Banorët e Teheranit, të kontaktuar nga Reuters, raportuan për një prani të madhe të forcave të sigurisë në qytet. /tesheshi.com/
